ന്യൂഡൽഹി : 10, 12 ക്ലാസുകളിലേക്ക് ഓഫ്ലൈൻ പരീക്ഷ നടത്താൻ അനുവദിക്കണമെന്ന് സുപ്രീം കോടതിയോട് ആവശ്യപ്പെടാൻ സംസ്ഥാന സർക്കാർ തീരുമാനിച്ചു. ഫെബ്രുവരി 28-ന് അകം പത്ത്, പന്ത്രണ്ട് ക്ളാസ്സുകളിലെ എല്ലാ സിലബസും പൂർത്തിയാക്കുമെന്നും സംസ്ഥാനം കോടതിയെ അറിയിക്കും. നവംബർ മുതൽ കേരളത്തിൽ ഓഫ്ലൈൻ ക്ളാസ്സുകൾ ആരംഭിച്ചിരുന്നു. അതിനാൽ ഫെബ്രുവരി അവസാനത്തോടെ സിലബസ് പ്രകാരമുള്ള എല്ലാ പാഠങ്ങളും പൂർത്തികരിക്കാനാകും. പരീക്ഷയ്ക്ക് തയ്യാറെടുക്കാൻ ഏതാണ്ട് ഒരു മാസത്തെ സമയം വിദ്യാർത്ഥികൾക്ക് അനുവദിക്കും. പത്താം ക്ളാസ് പരീക്ഷ മാർച്ച് 31-ന് ആരംഭിക്കാനാണ് തീരുമാനിച്ചിട്ടുള്ളത്. ഏപ്രിൽ 29 വരെ പരീക്ഷ നീണ്ടുനിൽക്കും.
പ്ലസ് ടു പരീക്ഷ മാർച്ച് 30-ന് ആരംഭിച്ച് ഏപ്രിൽ 22-ന് അവസാനിക്കും. വിദ്യാർത്ഥികളുടെ സൗകര്യംകൂടി കണക്കിലെടുത്താണ് പരീക്ഷ ടൈം ടേബിൾ തയ്യാറാക്കിയതെന്നും സംസ്ഥാന സർക്കാർ സുപ്രീം കോടതിയിൽ വ്യക്തമാക്കും. 10, 12 ക്ളാസ്സുകളിലേക്ക് സിബിഎസ്ഇ, ഐസിഎസ്ഇ, സംസ്ഥാന ബോർഡുകൾ എന്നിവ നടത്തുന്ന ഓഫ്ലൈൻ പരീക്ഷകൾക്ക് എതിരായ ഹർജി കോടതി പരിഗണിക്കാനിരിക്കെയാണ് സംസ്ഥാന സർക്കാർ പരീക്ഷ ഓഫ്ലൈനായി നടത്താൻ സജ്ജമാണെന്ന് കോടതിയെ അറിയിക്കാൻ തീരുമാനിച്ചത്. കോവിഡ് മഹാമാരിയെ തുടർന്ന് ക്ളാസ്സുകൾ മുടങ്ങിയതിനാൽ സിലബസ് പൂർത്തിയാക്കാൻ കഴിഞ്ഞിട്ടില്ല എന്നാണ് ഹർജിക്കാരുടെ വാദം. കഴിഞ്ഞ അധ്യനവർഷത്തിൽ ഓഫ്ലൈൻ പരീക്ഷ റദ്ദാക്കി മൂല്യനിർണയത്തിന് പ്രത്യേക സ്കീം സുപ്രീം കോടതി ഉത്തരവിട്ടിരുന്നു. ഈ വർഷവും സമാനമായ ഉത്തരവ് കോടതിയിൽ നിന്ന് ഉണ്ടാകണമെന്നാണ് ഹർജിക്കാരുടെ ആവശ്യം.
