തെന്മല : അനധികൃതമായി കൊണ്ടുവന്ന മൂന്നരക്കോടി വിലവരുന്ന തിമിംഗില വിസർജ്യവുമായി രണ്ടുപേരെ തെങ്കാശി പോലീസ് പിടികൂടി. കന്യാകുമാരി കുലശേഖരം സ്വദേശി ജോർജ് മിഷേൽറോസ്, തിരുനെൽവേലി താഴയത്ത് സ്വദേശി മോഹൻ എന്നിവരാണ് അറസ്റ്റിലായത്. തിങ്കളാഴ്ച വൈകീട്ട് ആറിന് തെങ്കാശി പഴയ ബസ് സ്റ്റാൻഡിനുസമീപം വാഹനപരിശോധനയ്ക്കിടെയാണ് ഇവർ പിടിയിലായത്. പോലീസിന്റെ വാഹനപരിശോധന കണ്ടതോടെ ഇവർ കാർ കുറച്ചുദൂരെ നിർത്തിയത് സംശയത്തിനിടയാക്കി. തുടർന്ന് പോലീസ് വിശദപരിശോധന നടത്തിയപ്പോഴാണ് 21 കിലോ തിമിംഗില വിസർജ്യം കാറിൽ കണ്ടെത്തിയത്. ചെന്നൈയിൽനിന്ന് കൊണ്ടുവന്നതാണെന്നു കരുതുന്നു. കസ്റ്റഡിയിലെടുത്തവരെയും കാറും കടയനല്ലൂർ വനംവകുപ്പ് അധികൃതർക്കു കൈമാറി. തെങ്കാശി ഇൻസ്പെക്ടർ ബാലമുരുകൻ, കർപ്പഗരാജ, സൗന്ദർരാജ് എന്നിവരുൾപ്പെട്ട സംഘമാണ് പരിശോധന നടത്തിയത്.
