ദില്ലി : പ്രധാനമന്ത്രി നരേന്ദ്ര മോദി മണിപ്പൂര്, ത്രിപുര സംസ്ഥാനങ്ങള് സന്ദര്ശിക്കുന്നു. ജനുവരി 4 നാണ് പ്രധാനമന്ത്രിയുടെ സന്ദര്ശനം. ഇരുസംസ്ഥാനങ്ങള്ക്കും പുതുവത്സര സമ്മാനമായി കോടികളുടെ വന്കിട പദ്ധതികളുമായാണ് മോദി എത്തുന്നത്. മണിപ്പൂരില് മാത്രം 4800 കോടിയുടെ പദ്ധതികളാകും പ്രഖ്യാപിക്കുക. ത്രിപുരയിലാകട്ടെ 100 വിദ്യാജ്യോതി സ്കൂളുകളുടെ പ്രഖ്യാപനമാണ് പ്രധാനമന്ത്രിയുടെ സന്ദര്ശനത്തിലെ പ്രധാന അജണ്ട.
മണിപ്പൂരില് 22 പദ്ധതികളാണ് പ്രധാനമന്ത്രി നടപ്പാക്കുക. ഏകദേശം 1850 കോടി രൂപയുടെ 13 പദ്ധതികള് ഉദ്ഘാടനം ചെയ്യുമ്പോള് 2950 കോടി രൂപയുടെ 9 പദ്ധതികളുടെ തറക്കല്ലിടലും പ്രധാനമന്ത്രി നിര്വഹിക്കും. റോഡ് ഇന്ഫ്രാസ്ട്രക്ചര്, കുടിവെള്ള വിതരണം, ആരോഗ്യം, നഗരവികസനം, പാര്പ്പിടം, വിവരസാങ്കേതികവിദ്യ, നൈപുണ്യ വികസനം, കല, സംസ്കാരം തുടങ്ങിയ വിവിധ മേഖലകളുമായി ബന്ധപ്പെട്ടുള്ളതാണ് ഈ പദ്ധതികളെന്ന് പ്രധാനമന്ത്രിയുടെ ഓഫീസ് വ്യക്തമാക്കി. രാജ്യവ്യാപകമായി ദേശീയപാത മെച്ചപ്പെടുത്തുന്നതിനുള്ള പദ്ധതികളുടെ ഭാഗമായി മണിപ്പൂരില് 1700 കോടിയിലധികം രൂപ ചെലവില് നിര്മ്മിക്കുന്ന അഞ്ച് ദേശീയ പാത പദ്ധതികളുടെ നിര്മ്മാണത്തിന് പ്രധാനമന്ത്രി തറക്കല്ലിടും. 110 കിലോമീറ്ററിലധികം ദൈര്ഘ്യമുള്ള ഈ ഹൈവേകളുടെ നിര്മ്മാണം ഈ മേഖലയുടെ റോഡ് കണക്റ്റിവിറ്റി മെച്ചപ്പെടുത്തുന്നതിനുള്ള ഒരു പ്രധാന ചുവടുവയ്പ്പായിരിക്കും. ഇംഫാലില് നിന്ന് സില്ച്ചാറിലേക്കുള്ള തടസ്സമില്ലാത്ത പാതയൊരുക്കുകയും ഗതാഗതക്കുരുക്ക് കുറയ്ക്കുകയും ചെയ്യുന്ന മറ്റൊരു പ്രധാന പദ്ധതിയും കൂട്ടത്തിലുണ്ട്. 75 കോടിയിലധികം രൂപ ചെലവില് നിര്മ്മിച്ച NH-37 ല് ബരാക് നദിക്ക് മുകളില് നിര്മ്മിച്ച സ്റ്റീല് പാലത്തിന്റെ നിര്മ്മാണമാണിത്. സ്റ്റീല് പാലം പ്രധാനമന്ത്രി ഉദ്ഘാടനം ചെയ്യും.
1100 കോടി രൂപ ചെലവില് നിര്മിച്ച 2,387 മൊബൈല് ടവറുകള് പ്രധാനമന്ത്രി മണിപ്പൂരിലെ ജനങ്ങള്ക്ക് സമര്പ്പിക്കും. സംസ്ഥാനത്തിന്റെ മൊബൈല് കണക്റ്റിവിറ്റി കൂടുതല് വര്ധിപ്പിക്കുന്നതിനുള്ള ഒരു പ്രധാന ചുവടുവയ്പായിരിക്കും ഇതെന്നാണ് പ്രതീക്ഷ. സംസ്ഥാനത്തെ കുടിവെള്ള വിതരണ പദ്ധതികളുടെ ഉദ്ഘാടനമാണ് മറ്റൊരു പ്രധാന പദ്ധതി. എല്ലാ വീട്ടിലും ശുദ്ധമായ കുടിവെള്ളം ലഭ്യമാക്കാന് സഹായകമാകുന്നതാണ് പദ്ധതി. ഇംഫാല് നഗരത്തില് മാത്രം 280 കോടി രൂപയുടെ കുടിവെള്ളപദ്ധതിയാണ് നടപ്പാക്കുന്നത്. തമെംഗ്ലോങ് ജില്ലയിലെ പത്ത് ആവാസ വ്യവസ്ഥകളില് താമസിക്കുന്നവര്ക്ക് ശുദ്ധമായ കുടിവെള്ളം ലഭ്യമാക്കുന്നതിനായി 65 കോടി രൂപ ചെലവില് നിര്മ്മിച്ച പദ്ധതിയും മോദി സമര്പ്പിക്കും. ജലവിതരണം മെച്ചപ്പെടുത്താന് 51 കോടിയുടെ മറ്റൊരു പദ്ധതിയും ഇക്കൂട്ടത്തിലുണ്ട്.
സംസ്ഥാനത്തെ ആരോഗ്യ മേഖലയെ ശക്തിപ്പെടുത്താനായുള്ള പദ്ധതികളും കൂട്ടത്തിലുണ്ട്. ഏകദേശം 160 കോടി രൂപയുടെ ‘സ്റ്റേറ്റ് ഓഫ് ആര്ട്ട് ക്യാന്സര് ഹോസ്പിറ്റലി’ന്റെ ശിലാസ്ഥാപനവും പ്രധാനമന്ത്രി ഇംഫാലില് നിര്വഹിക്കും. ക്യാന്സറുമായി ബന്ധപ്പെട്ട രോഗനിര്ണ്ണയ-ചികിത്സാ സേവനങ്ങള്ക്കായി സംസ്ഥാനത്തിന് പുറത്ത് പോകേണ്ടിവരുന്ന അവസ്ഥ ഒഴിവാക്കാന് ഇതിലൂടെ സാധിക്കുമെന്നാണ് പ്രതീക്ഷ. സംസ്ഥാനത്ത് കൊവിഡുമായി ബന്ധപ്പെട്ട അടിസ്ഥാന സൗകര്യങ്ങള് വര്ധിപ്പിക്കുന്നതിനായി 200 കിടക്കകളുള്ള കൊവിഡ് ആശുപത്രിയും പ്രധാനമന്ത്രി ഉദ്ഘാടനം ചെയ്യും. ഡിആര്ഡിഒയുമായി സഹകരിച്ചുള്ള പദ്ധതിയുടെ ചിലവ് 37 കോടിയാണ്. ഏകദേശം 200 കോടി രൂപ ചെലവില് സംസ്ഥാനത്ത് നിര്മിക്കുന്ന ‘സെന്റര് ഫോര് ഇന്വെന്ഷന്, ഇന്നൊവേഷന്, ഇന്കുബേഷന് ആന്ഡ് ട്രെയിനിങ് (സിഐഐഐടി)’ന്റെ തറക്കല്ലിടലും പ്രധാനമന്ത്രി നിര്വഹിക്കും. ഈ പദ്ധതി സംസ്ഥാനത്തെ ഏറ്റവും വലിയ പിപിപി സംരംഭമാണ്. പദ്ധതി സംസ്ഥാനത്ത് തൊഴിലവസരങ്ങള് സൃഷ്ടിക്കുന്നതിനൊപ്പം ഇന്ഫര്മേഷന് ടെക്നോളജി മേഖലയ്ക്ക് ഉത്തേജനം നല്കുന്നതുമാണ്.
പ്രധാനമന്ത്രി ജന് വികാസിന് കീഴില് ‘സബ്കാസാത്-സബ്കാ വികാസ്-സബ്കാ വിശ്വാസ്’ പദ്ധതിയിലൂടെ 130 കോടിയിലധികം വരുന്ന 72 പദ്ധതികള്ക്കും പ്രധാനമന്ത്രി തറക്കല്ലിടും. ന്യൂനപക്ഷ സമുദായങ്ങളുടെ സമഗ്രവികസനത്തിന് ആരോഗ്യ-വിദ്യാഭ്യാസ മേഖലകളിലെ അടിസ്ഥാന സൗകര്യവികസനത്തിന് ഈ പദ്ധതികള് സഹായകമാകും. സംസ്ഥാനത്തെ കൈത്തറി വ്യവസായത്തെ ശക്തിപ്പെടുത്തുന്നതിനായി 100 കോടി രൂപയുടെ രണ്ട് പദ്ധതികളുടെ തറക്കല്ലിടല് പ്രധാനമന്ത്രി നിര്വഹിക്കും. പുതിയ വ്യാവസായിക പരിശീലന ഇന്സ്റ്റിറ്റ്യൂട്ട് (ഐടിഐ), കാങ്പോക്പി എന്ഹാന്സിങ് സ്കില് ഡെവലപ്മെന്റ് ഇന്ഫ്രാസ്ട്രക്ചര് (ഇഎസ്ഡിഐ), ഇന്ഫര്മേഷന് ആന്ഡ് പബ്ലിക് റിലേഷന്സ് ഡയറക്ടറേറ്റിന്റെ പുതിയ ഓഫീസ് കെട്ടിടം എന്നിവയാണ് പ്രധാനമന്ത്രി ഉദ്ഘാടനം ചെയ്യുന്ന മറ്റ് പദ്ധതികള്.
മഹാരാജ ബിര് ബിക്രം (എംബിബി) വിമാനത്താവളത്തിന്റെ പുതിയ ഇന്റഗ്രേറ്റഡ് ടെര്മിനല് ബില്ഡിംഗിന്റെ ഉദ്ഘാടനമാണ് ത്രിപുരയില് പ്രധാനമന്ത്രിയുടെ പ്രധാന അജണ്ട. 100 വിദ്യാജ്യോതി സ്കൂളുകളുടെ ഉദ്ഘാടനവും മോദി നിര്വഹിക്കും. മഹാരാജ ബിര് ബിക്രം വിമാനത്താവളത്തിന്റെ പുതിയ ഇന്റഗ്രേറ്റഡ് ടെര്മിനല് ബില്ഡിംഗ് ഏകദേശം 450 കോടി രൂപ ചെലവില് നിര്മ്മിച്ചതാണ്. 30,000 ചതുരശ്ര മീറ്ററില് അത്യാധുനിക സൗകര്യങ്ങളുള്ളതും അത്യാധുനിക ഐടി നെറ്റ്വര്ക്ക് സംയോജിത സംവിധാനത്തിന്റെ പിന്തുണയുള്ളതുമായ അത്യാധുനിക കെട്ടിടമാണിത്. രാജ്യത്തെ എല്ലാ വിമാനത്താവളങ്ങളിലും ആധുനിക സൗകര്യങ്ങള് ഒരുക്കാനുള്ള പ്രധാനമന്ത്രി പദ്ധതിയുടെ ഭാഗമായാണ് പുതിയ ടെര്മിനല് കെട്ടിടത്തിന്റെ വികസനം.
നിലവിലുള്ള 100 ഹൈ/ഹയര്സെക്കന്ഡറി സ്കൂളുകളെ അത്യാധുനിക സൗകര്യങ്ങളോടും ഗുണനിലവാരമുള്ള വിദ്യാഭ്യാസത്തോടും കൂടി വിദ്യാജ്യോതി സ്കൂളുകളാക്കി മാറ്റും. സംസ്ഥാനത്തെ വിദ്യാഭ്യാസ നിലവാരം മെച്ചപ്പെടുത്തുകയാണ് വിദ്യാജ്യോതി സ്കൂളുകളിലൂടെ ലക്ഷ്യമിടുന്നത്. നഴ്സറി മുതല് പന്ത്രണ്ടാം ക്ലാസ് വരെയുള്ള 1.2 ലക്ഷം വിദ്യാര്ത്ഥികളെ ഉള്ക്കൊള്ളുന്ന പദ്ധതിക്ക് അടുത്ത മൂന്ന് വര്ഷത്തിനുള്ളില് ഏകദേശം 500 കോടി രൂപ ചിലവാകും.
