മുംബൈ ∙ മഹാരാഷ്ട്രയിലെ അഹമ്മദ്നഗറിൽ പാസഞ്ചർ ട്രെയിനിന് തീപിടിച്ച് അഞ്ചു കോച്ചുകൾ പൂർണമായി കത്തിനശിച്ചു. ബ്രേക്ക് വാനിൽ നിന്ന് തീ പടർന്നുണ്ടായ അപകടത്തിൽ ആളപായമോ പരുക്കോ ഇല്ല. തീ പടരുന്നതിനു മുൻപ് യാത്രക്കാരെ പുറത്തിറക്കിയതിനാൽ വൻദുരന്തം ഒഴിവായി. മറാഠ്വാഡ മേഖലയിലെ ബീഡിൽ നിന്ന് പശ്ചിമ മഹാരാഷ്ട്രയിലെ അഹമ്മദ്നഗറിലേക്കുളള ട്രെയിനിനാണ് വൈകിട്ട് മൂന്നിനു തീ പിടിച്ചത്. എട്ടു കോച്ചുകളാണ് ആകെയുണ്ടായിരുന്നത്. അപകടത്തെക്കുറിച്ച് റെയിൽവേ അന്വേഷണം ആരംഭിച്ചു.
