തൃശൂർ ∙ ആറ്റൂർ അയ്യപ്പ നാടൻ കലാസമിതിയുടെ കർമ്മശേഷ്ഠ പുരസ്ക്കാരത്തിന് മലയാള മനോരമ ചീഫ് ഫൊട്ടോഗ്രഫർ റസൽ ഷാഹുൽ അർഹനായി. 25,000 രൂപയും പ്രശസ്തിപത്രവും ശില്പവും അടങ്ങിയ പുരസ്കാരം ഡിസംബർ 16ന് സമ്മാനിക്കും.
തൃശൂരിലെ സാംസ്കാരിക പരമ്പരാഗത കൈത്തൊഴിൽ – ഫോക്ലോർ രംഗത്തെ അടയാളപ്പെടുത്തി മലയാള മനോരമയിൽ ‘തൃശ്ശൂർ സൂം’ എന്ന പേരിൽ 30 ഭാഗങ്ങളിലായി പ്രസിദ്ധീകരിച്ച ഫോട്ടോ ഫീച്ചറിലൂടെ ഫോക്ലോർ രംഗത്തെ അപ്രശസ്തരായ കലാകാരന്മാരെയും കൈത്തൊഴിൽ വിദഗ്ദരെയും നാടോടി സംസ്കാരത്തെയും തനിമ ചോരാതെ സ്വാഭാവികതയോടെ അവതരിപ്പിച്ചതിനാണ് പുരസ്കാരം.
തൃശൂരിലെ കരകൗശല -കൈതൊഴിൽ മേഖലയെയും പ്രാദേശിക സമ്പദ്‌വ്യവസ്ഥയെയും പ്രോത്സാഹിപ്പിക്കുന്നതിനൊപ്പം ഗവേഷണ വിദ്യാർത്ഥികൾക്ക് ഉതകുന്ന വിധത്തിൽ ഒരു വഴികാട്ടിയാണ് മലയാള മനോരമയിൽ പ്രസിദ്ധീകരിച്ച ചിത്രങ്ങളൊടൊപ്പമുള്ള വിവരണങ്ങളും മനോരമ ഓൺലൈനിൽ നൽകിയ ചെറു വിഡിയോ ലിങ്കുകളുമെന്ന് ആറ്റൂർ അയ്യപ്പ നാടൻ കലാസമിതി പ്രസിഡന്റ് ബിജു ആട്ടോർ, പ്രോഗ്രാം കോ ഓർഡിനേറ്റർ ടി.എ. ശങ്കരൻകുട്ടി, ജനറൽ കൺവീനർ കെ.വി. ചന്ദ്രൻ എന്നിവർ അറിയിച്ചു.
