തിരുവനന്തപുരം : ചലച്ചിത്ര അക്കാദമി ചെയർമാനായി സംവിധായകനും നടനുമായ രഞ്ജിത്തിനെ നിയമിച്ച് സർക്കാർ ഉത്തരവായി. വെള്ളിയാഴ്ച രാവിലെ അദ്ദേഹം ചുമതലയേൽക്കും. ചലച്ചിത്ര അക്കാദമിയിൽ രഞ്ജിത്തിനെയും സംഗീത നാടക അക്കാദമിയിൽ ഗായകൻ എം.ജി. ശ്രീകുമാറിനെയും ചെയർമാൻമാരാക്കാൻ സി.പി.എം. സംസ്ഥാന സെക്രട്ടേറിയറ്റ് തീരുമാനിച്ചിരുന്നെങ്കിലും സർക്കാർ തീരുമാനം വന്നിരുന്നില്ല. സംവിധായകൻ കമലിന് പകരമാണ് രഞ്ജിത്തിന്റെ നിയമനം. വ്യാഴാഴ്ച രഞ്ജിത്തിനെ നിയമിച്ച് ഉത്തരവിറക്കിയെങ്കിലും എം.ജി. ശ്രീകുമാറിന്റെ കാര്യത്തിൽ തീരുമാനം നീളുകയാണ്. ബി.ജെ.പി. അനുഭാവിയാണെന്നുപറഞ്ഞ് ശ്രീകുമാറിന്റെ നിയമനത്തിനെതിരേ സാമൂഹിക മാധ്യമങ്ങളിൽ വലിയ പ്രചാരണം ഉയർന്നിരുന്നു. സാഹിത്യ അക്കാദമി ഉൾപ്പെടെ മറ്റു സാംസ്കാരിക സ്ഥാപനങ്ങളിലെ മാറ്റം സംബന്ധിച്ച തീരുമാനം വരുംദിവസങ്ങളിൽ ഉണ്ടാകും.
