റിയാദ്: ലഗേജ് കൊണ്ടുപോകുന്ന കൺവെയർ ബെൽറ്റ് തകരാറിലായതിനെ തുടർന്ന് റിയാദ് കിങ് ഖാലിദ് അന്താരാഷ്ട്ര വിമാനത്താവളത്തിൽ വിമാന സർവിസുകൾ വൈകി. മൂന്ന്, നാല് ടെർമിനലുകളിൽനിന്നുള്ള സർവിസുകളാണ് മണിക്കൂറുകളോളം വൈകിയത്.
സൗദി എയർലൈൻസും നാസ് എയറും സർവിസ് നടത്തുന്ന ടെർമിനലുകളിലാണ് തകരാറുണ്ടായത്. കൺവെയർ ബെൽറ്റ് പ്രവർത്തനം തകരാറിലാവുകയും ലഗേജ് നീക്കം തടസപ്പെടുകയും ചെയ്തു. റിയാദിൽനിന്ന് കൊച്ചിയിലേക്ക് രാവിലെ 10.50ന് പോകേണ്ട സൗദി എയർലൈൻസ് വിമാനം ഉച്ചകഴിഞ്ഞ് 1.30നാണ് പുറപ്പെട്ടത്. പല രാജ്യങ്ങളിലേക്കുള്ള വിമാനങ്ങളും വൈകി. ഉച്ചയോടെ തകരാറുകൾ പരിഹരിച്ച് പ്രവർത്തസജ്ജമായി. യാത്രക്കാരോട് എയർപ്പോർട്ട് അതോറിറ്റി ക്ഷമ ചോദിക്കുകയും ചെയ്തു.
