ന്യൂഡൽഹി : നാഷണൽ ബോർഡ് ഓഫ് എക്സാമിനേഷൻസ് ഇൻ മെഡിക്കൽ സയൻസസ് (എൻബിഇഎംഎസ്) നീറ്റ് എസ്എസ് 2021 അഡ്മിറ്റ് കാർഡ് പ്രസിദ്ധീകരിച്ചു. എൻബിഇഎംഎസിന്റെ ഔദ്യോഗിക വെബ്സൈറ്റായ nbe.edu.in ൽ അഡ്മിറ്റ് കാർഡ് ലഭ്യമാണ്. ഓൺലൈൻ അപേക്ഷ വിജയകരമായി പൂർത്തിയാക്കിയവർക്ക് അഡ്മിറ്റ് കാർഡ് ഡൗൺലോഡ് ചെയ്യാം. എക്സാം കേന്ദ്രത്തിലെത്തുമ്പോൾ അഡ്മിറ്റ് കാർഡിന്റെ പ്രിന്റഡ് കോപ്പി കയ്യിൽ കരുതണം.
അഡ്മിറ്റ് കാർഡ് ഡൗൺലോഡ് ചെയ്യേണ്ടത് ഇങ്ങനെ
എൻബിഇഎംഎസിന്റെ ഔദ്യോഗിക വെബ്സൈറ്റ് സന്ദർശിച്ച ശേഷം ഹോം പേജിൽ നീറ്റ്-എസ്എസ് സെലക്ട് ചെയ്യുക. ശേഷം വരുന്ന വിൻഡോയിൽ ആപ്ലിക്കേഷൻ ലിങ്ക് ക്ലിക്ക് ചെയ്യുക. തുടർന്ന് വരുന്ന ലോഗിനിൽ മുമ്പ് രജിസ്റ്റർ ചെയ്ത വിവരങ്ങളുപയോഗിച്ച് ലോഗിൻ ചെയ്യുക. പിന്നീട് വരുന്ന നീറ്റ്-എസ്എസ് അഡ്മിറ്റ് കാർഡ് ഓപ്ഷനിൽ നിന്നും അഡ്മിറ്റ് കാർഡ് ഡൗൺലോഡ് ചെയ്യുക. അഡ്മിറ്റ് കാർഡിൽ നിർദിഷ്ട സ്ഥലത്ത് ഫോട്ടോ പതിപ്പിക്കണം. ഫോട്ടോയ്ക്കായി നൽകിയ സ്പേസിനുള്ളിൽ തന്നെ ഫോട്ടോ നിൽക്കണം. വൈറ്റ് ബാക്ഗ്രൗണ്ടുള്ള ചിത്രമാണ് വേണ്ടത്. അഡ്മിറ്റ് കാർഡിലെ വിവരങ്ങൾ ശരിയാണോ എന്നുറപ്പ് വരുത്തുക. എക്സാം കേന്ദ്രത്തിന് പുറത്ത് വെരിഫിക്കേഷനായി ഒരു ക്യുആർ കോഡും അഡ്മിറ്റ് കാർഡിലുണ്ടാകും. ആധാറോ, വോട്ടേഴ്സ് ഐഡിയോ പോലെയുള്ള ഐ.ഡി പ്രൂഫും ഒപ്പം കരുതുക. കാൽക്കുലേറ്റർ, പെൻ, റൈറ്റിംഗ് പാഡ്, ഫോൺ, ബ്ലൂടൂത്ത്, ഇയർഫോൺ എന്നിവയൊന്നും പരീക്ഷാ കേന്ദ്രത്തിൽ അനുവദിക്കില്ല. തെർമൽ സ്കാനിങിന് ശേഷമായിരിക്കും വിദ്യാർത്ഥികളെ പരീക്ഷാ കേന്ദ്രത്തിലേക്ക് പ്രവേശിപ്പിക്കുക. റിപ്പോർട്ടിംഗ് സമയത്ത് തന്നെ പരീക്ഷാ കേന്ദ്രത്തിലെത്താൻ ശ്രദ്ധിക്കണം. വൈകിയെത്തുന്നവരെ പരീക്ഷ എഴുതാൻ അനുവദിക്കില്ല.
