തിരുവനന്തപുരം : ബുദ്ധിമാന്ദ്യമുള്ളവര്‍ മാത്രമേ സില്‍വര്‍ ലൈനിനെ എതിര്‍ക്കൂ എന്ന് സിപിഎം കേന്ദ്രകമ്മിറ്റിയംഗം ഇ.പി.ജയരാജന്‍. സില്‍വര്‍ ലൈന്‍ കേരളത്തെ വിഭജിക്കും എന്ന വാദം വിഡ്ഢിത്തമാണ്. സര്‍വേക്കല്ല് പിഴുതാല്‍ പദ്ധതി വരില്ല എന്നാണ് ചിലരുടെ വാദം. വിവരദോഷികളും വകതിരിവില്ലാത്തവരും രാഷ്ട്രീയ നേതൃത്വത്തില്‍ വന്നാല്‍ ഇങ്ങനെ പല വിഡ്ഢിത്തങ്ങളും പറയും. ‘കെ–റെയിൽ കേരളത്തിന്റെ സമഗ്ര വികസനത്തിനുള്ളതാണ്. അത് വരും. വിവരദോഷികളും ദീർഘവീക്ഷണമില്ലാത്തവരും എടുത്തുചാട്ടക്കാരുമൊക്കെ രാഷ്ട്രീയ നേതൃത്വത്തിൽ വന്നാല്‍ ഇങ്ങനെ പല വിഡ്ഢിത്തങ്ങളും ചെയ്യും. ഇതൊക്കെ ഏതോ കാലത്തെ ചിന്താഗതികളാണ്. ഇത് ആധുനിക കാലഘട്ടമാണ്. ലോകം വളരുകയാണ്. അതിനനുസരിച്ച് ചിന്തയും വളരണം. ഒരു നൂറുവർഷം അപ്പുറത്തെ ചിന്തയും കൊണ്ട് കോൺഗ്രസ് നടന്നാൽ ഇന്ത്യയിൽ എല്ലായിടത്തും കോൺഗ്രസ് തകരും. മന്ദബുദ്ധി ബാധിച്ച ആളുകൾമാത്രമേ ഈ പദ്ധതിയെ എതിർക്കൂ’– ഇ.പി.ജയരാജൻ പറഞ്ഞു.
