കാസര്കോട്∙ തൃക്കരിപ്പൂരില് പോക്സോ കേസിൽ പ്രതിചേർക്കപ്പെട്ട അധ്യാപകനെ ഒരുമാസമായിട്ടും പിടികൂടാനാകാതെ പൊലീസ്. പൊറോപ്പാട് സ്വദേശി ബാബു ഡിസംബർ 10 മുതൽ ഒളിവിലാണ്. കൗണ്സിലിങ്ങിനിടെയാണ് അധ്യാപകനില്നിന്നുണ്ടായ മോശം അനുഭവത്തെക്കുറിച്ചു വിദ്യാര്ഥി തുറന്നു പറഞ്ഞത്. അധ്യാപകനെതിരെ ചന്തേര പൊലീസ് ആണ് കേസ് റജിസ്റ്റർ ചെയ്തത്. പിറ്റേദിവസം പ്രതിയായ അധ്യാപകന് സ്കൂളിലെത്തിയെങ്കിലും പിന്നീട് കാണാതാവുകയായിരുന്നു. കടല്ത്തീരത്തുവച്ച് അവസാനമായി കണ്ടതിനാൽ കടലിൽ തിരച്ചിൽ നടത്തിയെങ്കിലും ഫലമുണ്ടായില്ല. അധ്യാപകന്റെ ബൈക്ക് ഉപേക്ഷിച്ച നിലയിലായിരുന്നു.
പ്രത്യേകസംഘം രൂപീകരിച്ചാണ് കേസന്വേഷണം പുരോഗമിക്കുന്നത്. അധ്യാപകന്റെ ബന്ധുക്കളും സുഹൃത്തുക്കളുമുൾപ്പെടെ 50ലേറെ പേരുടെ ഫോൺ കോളുകൾ പൊലീസിന്റെ നിരീക്ഷണത്തിലാണ്. കേരളത്തിനു പുറത്ത് ഇയാൾ പോകാൻ സാധ്യതയുള്ള സ്ഥലങ്ങളിലും പൊലീസ് അന്വേഷണം നടത്തുന്നുണ്ട്.
