ആലപ്പുഴ∙ കരുനാഗപ്പള്ളി ലഹരി കടത്ത് കേസില് പിടിയിലായ വാഹനത്തിന്റെ ഉടമയായ ആലപ്പുഴ നഗരസഭയിലെ സിപിഎം കൗൺസിലർ എ.ഷാനവാസ്, കേസിലെ പ്രതിയോടൊപ്പം പിറന്നാൾ പാർട്ടി നടത്തുന്നതിന്റെ വിഡിയോ പുറത്ത്. നഗരത്തിലെ മറ്റു ചില സിപിഎം പ്രവർത്തകരെയും എസ്എഫ്ഐ ഭാരവാഹികളെയും വിഡിയോയിൽ കാണാം. ഒരു കോടിയിലേറെ രൂപ വിലവരുന്ന, നിരോധിച്ച പുകയില ഉൽപന്നങ്ങൾ പിടികൂടിയതിന് ഏതാനും ദിവസം മുൻപായിരുന്നു ആഘോഷം.ലഹരി കടത്തുമായി ബന്ധമില്ലെന്നും ലോറി താൻ വാടകയ്ക്കു കൊടുത്തതാണെന്നും വാദിച്ച ഷാനവാസ് ഇതോടെ പ്രതിരോധത്തിലായി. വാഹനം വാടകയ്ക്കു കൊടുത്തതിനു തെളിവായി ഷാനവാസ് ഹാജരാക്കിയ രേഖയെപ്പറ്റിയും സംശയം ഉയർന്നിരുന്നു. ഷാനവാസ് കുറ്റക്കാരനാണെങ്കിൽ കർശന നടപടി ഉറപ്പെന്ന് പാർട്ടി ജില്ലാ സെക്രട്ടറി ആർ.നാസർ പറഞ്ഞു. മുൻപ് ഒരു സ്ത്രീയെ ഭീഷണിപ്പെടുത്തിയതിനു ഷാനവാസിനെ പാർട്ടിയിൽനിന്നു പുറത്താക്കിയിരുന്നു.
