കോന്നി: കോന്നി പയ്യനാമണ്ണില് ഒരു കുടുംബത്തിലെ മൂന്നു പേര് മരിച്ച സംഭവത്തിന്റെ നടുക്കത്തിലാണ് നാട്ടുകാര്. പത്തലുകുത്തി തെക്കിനേത്ത് സോണിയുടേയും ഭാര്യ റീനയുടേയും മകന് റയാന്റേയും മരണവാര്ത്ത കേട്ടാണ് നാട് നടുങ്ങിയത്. കഴിഞ്ഞ വെള്ളിയാഴ്ച്ച മുതല് ഈ വീട്ടില് ആളനക്കമില്ലായിരുന്നു. ചുറ്റുവട്ടമുള്ളവരുമായി വലിയ ബന്ധമില്ലാത്തതിനാല് ആരും ശ്രദ്ധിച്ചില്ല. എന്നാല് സോണിയുടെ ബന്ധുക്കള് ഇവരെ ഫോണില് വിളിച്ചിട്ട് കിട്ടാത്തതിനെ തുടര്ന്ന് ഇവര് താമസിക്കുന്ന വീടിന് സമീപത്തെ ബന്ധുവിനെ വിളിച്ച് അന്വേഷിച്ചു. തുടര്ന്ന് സമീപവാസികളുമായി ചെന്ന് നോക്കിയപ്പോള് വീടിന്റെ ഒരു മുറിയില് റീനയും കുഞ്ഞും മറ്റൊരു മുറിയില് സോണി തൂങ്ങി മരിച്ച നിലയിലും കാണുകയായിരുന്നു.
ഉടന് തന്നെ കോന്നി പോലീസില് വിവരം അറിയിച്ചു. പ്രാഥമിക പരിശോധനയില് ഭാര്യയേയും വളര്ത്തുമകനേയും കൊലപെടുത്തിയ ശേഷം സോണി ആത്മഹത്യ ചെയ്തതാണെന്ന വിവരം. കഴിഞ്ഞ വെള്ളിയാഴ്ച്ച സോണി തന്റെ വീട്ടിലെ ജോലിക്കാരിയായ തുളസിയെ ഫോണില് വിളിച്ച് ഇന്ന് ജോലിക്ക് വരേണ്ടതില്ലെന്നും കുടുംബവുമായി കൊല്ലം വരെ പോവുകയാണെന്നും രണ്ട് ദിവസം കഴിഞ്ഞേ വരുകയുള്ളു എന്നും പറഞ്ഞിരുന്നു. അടുത്ത ബന്ധുക്കള്ക്ക് ഈ കാര്യം വാട്സപ്പില് സന്ദേശം അയക്കുകയും ചെയ്തു.ഇതിനാല് സംശയമുണ്ടായില്ല. എന്നാല് ശനിയാഴ്ച്ച ബന്ധുക്കള് ഇരുവരുടേയും ഫോണില് വിളിച്ച് കിട്ടാതായതോടെ ഞായറാഴ്ച്ച അന്വേഷിച്ച് വീട്ടില് വന്നപ്പോഴാണ് ദുരന്തവാര്ത്ത അറിഞ്ഞത്. മകന് റയാനെ തലയ്ക്കടിച്ചും ഭാര്യ റീനയെ വെട്ടി പരുക്കേല്പ്പിക്കുകയും ശേഷം ഇരുവരുടേയും മരണം ഉറപ്പാക്കിയ ശേഷം സോണി മറ്റൊരു മുറിയില് ആത്മഹത്യ ചെയ്തതാകാം എന്നാണ്
പോലീസിന്റെ പ്രാഥമിക നിഗമനം. സംഭവമറിഞ്ഞ് നിരവധിപേരാണ് സോണിയുടെ വീടിന് സമീപം തടിച്ചുകൂടിയത്.
