കോഴിക്കോട്: കമ്മ്യൂണിസ്റ്റ് പാർട്ടി സ്ഥാപക നേതാവായിരുന്ന പി.കൃഷ്ണപിള്ളയുടെ പേരിൽ സാംസ്കാാരിക നിലയം നിർമിക്കാൻ അഞ്ചേക്കർ ഭൂമി അനുവദിച്ച് റവന്യൂ വകുപ്പിന്റെ ഉത്തരവ്. ആലപ്പുഴ താമരക്കുളം വില്ലേജിൽ രണ്ടാം ബ്ലോക്കിൽ റീസർവേ നമ്പർ 30-ൽപ്പെട്ട അഞ്ച് ഏക്കർ ഭൂമിയാണ് അനുവദിച്ചത്. ആരോഗ്യ വകുപ്പിന്റെ കാവശമുള്ള ഭൂമിയാണ് സാംസ്കാരിക സമുച്ചയ നിർമാണത്തിനായി റവന്യൂ വകുപ്പിന് വിട്ടുനൽകുന്നത്.
സാംസ്കാരിക സമയം നിർമിക്കുന്നതിനായി സാംസ്കാരിക വകുപ്പിന് കൈമാറി നൽകുന്നതിന് ആലപ്പുഴ കലക്ടർ ശുപാർശ നൽകിയിരുന്നു. അത് പ്രകാരം ഈ ഭൂമിക്ക് 2.02 കോടി രൂപ വില വരും. അതിൽ സ്ഥലത്തെ മരങ്ങളുടെ വില നിശ്ചയിച്ചിട്ടില്ലെന്നും ലാൻഡ് കമീഷണർ അറിയിച്ചു.
സർക്കാരിന്റെ രണ്ട് വകുപ്പുകൾ തമ്മിലുള്ള ഭൂമി കൈമാറ്റ വ്യവസ്ഥകൾക്ക് വിധേയമായി ഈ ഭൂമി ഉടമസ്ഥാവകാശം റവന്യൂ വകുപ്പിൽ നിലനിർത്തി സാംസ്കാരിക കാര്യ വകുപ്പിന് ഉപയോഗാനുമതി നൽകുന്ന കാര്യം പരിഗണിക്കാവുന്നതാണെന്ന് ലാൻഡ് റവന്യൂ കമീഷണർ റിപ്പോർട്ട് നൽകി. ഭൂമി അനുവദിച്ച് ആവശ്യത്തിന് മാത്രമേ ഉപയോഗിക്കാവു എന്നി തുടങ്ങി ഏഴ് വ്യവസ്ഥകളോടെയാണ് ഉത്തരവ്.
