ഇന്ത്യൻ ക്രിക്കറ്റ് താരം കെ.എൽ രാഹുലിനും ബോളിവുഡ് നടി അതിയ ഷെട്ടിക്കും വിവാഹത്തിന് ലഭിച്ചത് കോടികളുടെ സമ്മാനങ്ങൾ. അതിയയുടെ പിതാവും ബോളിവുഡ് നടനുമായ സുനിൽ ഷെട്ടിയും ഭാര്യയും ചേർന്ന് വധൂവരന്മാർക്ക് സമ്മാനമായി നൽകിയത് 50 കോടി വിലവരുന്ന വീടാണ്. ബോളിവുഡ് നടന്മാരായ സൽമാൻ ഖാൻ 1.64 കോടിയുടെ ഔഡി കാറും അർജുൻ കപൂർ 1.5 കോടി വിലവരുന്ന ഡയമണ്ട് നെക്ലേസും ജാക്കി ഷ്രോഫ് 30 ലക്ഷത്തിന്റെ വാച്ചും സമ്മാനമായി നൽകി.
വിരാട് കോഹ്ലിയും ബോളിവുഡ് നടിയും ഭാര്യയുമായ അനുഷ്ക ശര്മയും ചേര്ന്ന് 2.17 കോടി രൂപ വിലമതിക്കുന്ന ബി.എം.ഡബ്ല്യു കാറാണ് വിവാഹ സമ്മാനമായി നല്കിയത്. മുൻ ഇന്ത്യൻ ക്രിക്കറ്റ് ടീം നായകൻ മഹേന്ദ്ര സിങ് ധോണി 80 ലക്ഷത്തിന്റെ കവാസാക്കി നിഞ്ജ ബൈക്കും സമ്മാനമായി നൽകി. എന്നാൽ, ന്യൂസിലാന്ഡിനെതിരായ പരമ്പരയില് കളിക്കുന്നതിനാല് ഇന്ത്യന് താരങ്ങള്ക്ക് വിവാഹ ചടങ്ങിൽ പങ്കെടുക്കാനായില്ല.
സുനിൽ ഷെട്ടിയുടെ ഖണ്ഡാലയിലെ ഫാംഹൗസിൽ ജനുവരി 23നായിരുന്നു വിവാഹ ചടങ്ങുകൾ. ഏറെ നാളത്തെ പ്രണയത്തിനൊടുവിലാണ് രാഹുലും അതിയയും വിവാഹിതരായത്. അടുത്ത സുഹൃത്തുക്കളും ബന്ധുക്കളും മാത്രമാണ് ചടങ്ങിൽ പങ്കെടുത്തത്. ഐ.പി.എൽ സീസണ് ശേഷം പ്രത്യേക വിവാഹ വിരുന്ന് നടത്തുമെന്ന് ഇരുവരുടെയും കുടുംബം അറിയിച്ചു.
