കോഴിക്കോട്: കോഴിക്കോട് കായക്കൊടിയില് അയല്വാസികളുടെ ദുരൂഹ മരണത്തിന്റെ ചുരുളഴിയുന്നു. ബാബുവിനെ കൊലപ്പെടുത്തിയ ശേഷം അയല്വാസിയായ രാജീവന് തൂങ്ങി മരിച്ചതാണെന്ന് പൊലീസിന്റെ നിഗമനം. രാജീവന്റെ കാലില് രക്തക്കറ കണ്ടെത്തിയതും നിര്ണായകമായി. കഴിഞ്ഞ ദിവസം രാവിലെയാണ് ഹോട്ടല് തൊഴിലാളിയായ ബാബുവിനെ വീട്ടില് കഴുത്തറുത്ത് മരിച്ച നിലയില് കണ്ടെത്തിയത്. മൂര്ച്ചയേറിയ ആയുധം ഉപയോഗിച്ച് വയര് കീറിയ നിലയിലായിരുന്നു.
തൊട്ടു പുറകേ അയല്വാസിയായ രാജീവനെ വീട്ടിലെ വിറകുപുരയില് തൂങ്ങിമരിച്ച നിലയിലും കണ്ടെത്തി. തുടർന്ന് നടത്തിയ അന്വേഷണത്തിലാണ് ബാബുവിനെ കൊലപ്പെടുത്തിയ ശേഷം രാജീവന് തൂങ്ങി മരിച്ചതാണെന്ന നിഗമനത്തിലേക്ക് പൊലീസെത്തിയത്. രാജീവന്റെ കാലില് രക്തം പുരണ്ടതായി കണ്ടെത്തിയിരുന്നു. രക്തത്തിന്റെ അംശം ഫോറന്സിക് പരിശോധനക്ക് അയച്ചു. ചില തെറ്റിദ്ധാരണകളുടെ പേരില് രാജീവന് ബാബുവിനെ കൊലപ്പെടുത്തിയതായാണ് പൊലീസിന്റെ നിഗമനം. പോസ്റ്റമോർട്ടത്തിന് ശേഷം ഇരുവരുടേയും മൃതദേഹം സംസ്കരിച്ചു.
