കൊച്ചി : നടിയെ ആക്രമിച്ച കേസിൽ സംവിധായകൻ ബാലചന്ദ്രകുമാറിന്റെ വെളിപ്പെടുത്തലിൽ പ്രതി പൾസർ സുനിയെ ചോദ്യം ചെയ്യാനൊരുങ്ങി ക്രൈംബ്രാഞ്ച്. ചോദ്യം ചെയ്യലിനായി അന്വേഷണ സംഘം ഇന്നു കോടതിയിൽ അപേക്ഷ നൽകും. പൾസർ സുനിക്ക് ദിലീപുമായും ബാലചന്ദ്രകുമാറുമായും ബന്ധമുണ്ടെന്നു വ്യക്തമാക്കുന്ന ഓഡിയോ പുറത്തു വന്നതിനു പിന്നാലെയാണ് അന്വേഷണ സംഘത്തിന്റെ നടപടി. ജയിലിൽ കഴിയുന്ന പൾസർ സുനിയുമായി ഫോണിൽ സംസാരിച്ച ജിൻസന്റെ മൊഴിയും ക്രൈംബ്രാഞ്ച് രേഖപ്പെടുത്തും.
ബാലചന്ദ്രകുമാറിനെ പല പ്രാവശ്യം ദിലീപിന്റെ വീട്ടിലും ഫ്ലാറ്റിലും വച്ചു കണ്ടിട്ടുണ്ടെന്നാണ് സുനി ഇയാളുടെ സഹതടവുകാരനായിരുന്ന ചാലക്കുടി സ്വദേശി ജിൻസനോടു ഫോൺ സംഭാഷണത്തിൽ പറയുന്നത്. പൾസർ സുനിയെ ദിലീപിനൊപ്പം പലപ്രാവശ്യം കണ്ടെന്ന് ബാലചന്ദ്രകുമാർ വെളിപ്പെടുത്തിയിരുന്നു. ഇതു സ്ഥിരീകരിക്കുന്ന ഫോൺ സന്ദേശമാണ് പുറത്തു വന്നത്. ഈ സാഹചര്യത്തിലാണ് സുനിയോടു സംസാരിച്ച ജിൻസന്റെ മൊഴി രേഖപ്പെടുത്തുന്നത്. പൾസർ സുനിയുടെ അമ്മയുടെ രഹസ്യ മൊഴിയെടുക്കുന്നതിനും നടപടികൾ പൂർത്തിയായിട്ടുണ്ട്. നേരത്തെയും പൾസർ സുനിയുടെ ദിലീപ് ബന്ധം ജിൻസനിലൂടെയാണ് ക്രൈംബ്രാഞ്ച് പുറത്തു കൊണ്ടു വന്നത്. സുനി ഇപ്പോഴും ജിൻസനുമായി അടുപ്പം പുലർത്തുകയും ഫോണിൽ വിളിക്കുകയും ചെയ്യുന്നുണ്ട്.
