അഹമ്മദാബാദ്> ഗുജറാത്തിലെ രാജ്കോട്ടില് ഭൂചലനം. റിക്ടര് സ്കെയലില് 4.3 തീവ്രത രേഖപ്പെടുത്തിയ ഭൂചലനമാണുണ്ടായതെന്ന് നാഷണല് സെന്റര് ഫോര് സീസ്മോളജി അറിയിച്ചു. ഭൂചലനത്തില് ആളപായമോ നാശനഷ്ടങ്ങളോ ഇത് വരെ റിപ്പോര്ട്ട് ചെയ്തിട്ടില്ല.
8 ദിവസത്തിനിടയിലില് ഗുജറാത്തില് റിപ്പോര്ട്ട് ചെയ്യുന്ന അഞ്ചാമത്തെ ഭൂചലനമാണിത്. ഗുജറാത്തിലെ അമ്രേലി ജില്ലയില് രണ്ട് ദിവസത്തിനിടെ മൂന്ന് ചെറിയ ഭൂചലനങ്ങള് രേഖപ്പെടുത്തിയതായി സെന്റര് ഫോര് സീസ്മോളജി വ്യക്തമാക്കി. അമ്രേലി ജില്ലയിലെ സവര്കുണ്ഡ്ല താലൂക്കിലെ മിതിയാല ഗ്രാമത്തില് റിക്ടര് സ്കെയിലില് 3.4, 3.1,3.1 എന്നിങ്ങനെ തീവ്രത രേഖപ്പെടുത്തിയ ഭൂചലനങ്ങളാണ് റിപ്പോര്ട്ട് ചെയ്തത്. വ്യാഴാഴ്ച രാത്രി സൗരാഷ്ട്ര മേഖലയിലെ ഖംഭയില് 3.4 തീവ്രത രേഖപ്പെടുത്തിയ ഭൂചലനവും അനുഭവപ്പെട്ടിരുന്നു. അതിന് മുമ്പ് ഫെബ്രുവരി 19-ന് ഖംഭ മേഖലയില് 2.2 തീവ്രത രേഖപ്പെടുത്തിയ ഭൂചലനം അനുഭവപ്പെട്ടിരുന്നു.
അമ്രേലി ജില്ലയില് മാത്രം കഴിഞ്ഞ രണ്ട് വര്ഷത്തിനിടെ 400 ഓളം നേരിയ ഭൂചലനങ്ങള് റിപ്പോര്ട്ട് ചെയ്തിട്ടുണ്ട്. സൗരാഷ്ട്ര മേഖലയില് സ്ഥിതി ചെയ്യുന്ന ഗുജറാത്തിലെ കച്ച് ജില്ലയില് 2001 ജനുവരിയില് ഉണ്ടായ ഭൂകമ്പത്തില് 13,800 പേര് കൊല്ലപ്പെടുകയും 1.67 ലക്ഷം പേര്ക്ക് പരുക്കേല്ക്കുകയും ചെയ്തു. ഭൂചലനത്തില് ജില്ലയിലെ വിവിധ നഗരങ്ങളിലും ഗ്രാമങ്ങളിലും വന് നാശനഷ്ടമാണുണ്ടായത്.
