ഇന്ന് മാര്ച്ച് മൂന്ന്, ലോക കേള്വി ദിനമാണ്. കേള്വിത്തകരാറുകള് തടയുന്നതിനും, കേള്വിപ്രശ്നങ്ങള് സമയബന്ധിതമായി കണ്ടെത്തി പരിഹാരം തേടുന്നതിനുമെല്ലാമായി അവബോധം സൃഷ്ടിക്കുന്നതിനാണ് കേള്വി ദിനം ആചരിക്കുന്നത്. ലോകാരോഗ്യസംഘടനയുടെ നേതൃത്വത്തില് ഈ ദിവസം ലോകമെമ്പാടുമായി പല ബോധവത്കരണപരിപാടികളും സംഘടിപ്പിക്കാറുണ്ട്.
ഇടവിട്ട് ആരോഗ്യകാര്യങ്ങള് ചെക്കപ്പിലൂടെ അറിഞ്ഞുവയ്ക്കണമെന്ന് ഡോക്ടര്മാരെല്ലാം തന്നെ എല്ലായ്പോഴും നിര്ദേശിക്കുന്നതാണ്. എന്നാല് കേള്വിയുമായി ബന്ധപ്പെട്ട പരിശോധനകള് ഇത്തരത്തില് ഇടവേളകളില് നടത്തിനോക്കുന്നവര് വളരെ കുറവാണ്. ഈ പരിശോധനയുടെ തോത് വര്ധിപ്പിക്കണമെന്ന സന്ദേശമാണ് ഇക്കുറി കേള്വി ദിനത്തില് ലോകാരോഗ്യ സംഘടന കൈമാറുന്നത്.
എന്തായാലും ഈ കേള്വിദിനത്തില് കേള്വിത്തകരാറുകളെ മുൻകൂട്ടി തന്നെ പ്രതിരോധിക്കാൻ സഹായിക്കുന്ന ചില കാര്യങ്ങളാണിനി പങ്കുവയ്ക്കുന്നത്.
ഒന്ന്…
ഹൃദയാരോഗ്യം എപ്പോഴും കാത്തൂസൂക്ഷിക്കുക. കാരണം ഹൃദയം പ്രശ്നത്തിലാകുന്നതും അതുപോലെ ബിപിയും (രക്തസമ്മര്ദ്ദം) കേള്വിയെ ബാധിക്കാറുണ്ട്. ബിപിക്കൊപ്പം തന്നെ കൊളസ്ട്രോളുള്ളവരും കരുതലെടുക്കേണ്ടതുണ്ട്. കാരണം കൊളസ്ട്രോളും ഹൃദയത്തെ അപകടത്തിലാക്കാം.
രണ്ട്…
ശബ്ദമലിനീകരണം കേള്വിയെ ബാധിക്കാതിരിക്കാൻ പുറത്തിറങ്ങുമ്പോള് ഇയര് പ്ലഗ്സ് ഉപയോഗിക്കുന്നത് ശീലമാക്കാവുന്നതാണ്. പ്രത്യേകിച്ച് ശബ്ദമലിനീകരണതോത് വളരെയധികം ഉയര്ന്നിട്ടുള്ള ഇക്കാലത്ത് ഈ ശീലം ഏറെ ഫലപ്രദമായിരിക്കും.
മൂന്ന്…
ഹെഡ്സെറ്റ് ഉപയോഗിക്കുമ്പോള് അളവിലുമധികം ശബ്ദം വയ്ക്കാതിരിക്കുക. അതുപോലെ തന്നെ ‘നോയിസ് കാൻസലിംഗ് ഹെഡ്സെറ്റ്’ ഉപയോഗിക്കാൻ പരമാവധി ശ്രമിക്കുക. ഇവ ചുറ്റുപാടുകളില് നിന്നുള്ള ശബ്ദമലിനീകരണം കുറയ്ക്കുകയും അതിനാല് ഹെഡ്സെറ്റില് അധികശബ്ദം വയ്ക്കുന്നത് കുറയ്ക്കുകയും ചെയ്യും.
നാല്…
ഒരുപാട് ആരോഗ്യപ്രശ്നങ്ങള്ക്ക് ഇടയാക്കുന്ന ദുശ്ശീലമാണ് പുകവലി. കേള്വിയെയും പുകവലി വലിയ അളവില് ബാധിക്കാം. അതിനാല് പുകവലി പരമാവധി ഒഴിവാക്കുക.
അഞ്ച്…
ചെവിയുടെ ആകെ ആരോഗ്യത്തിന് നല്ല രക്തയോട്ടം ആവശ്യമാണ്. അതിനാല് വ്യായാമം പതിവാക്കുന്നത് ഏറെ നല്ലതാണ്. ഇത് ശരീരത്തിന്റെ വിവിധ ഭാഗങ്ങളിലേക്കുള്ള രക്തയോട്ടം വര്ധിപ്പിക്കും. സ്വാഭാവികമായും ചെവിയിലെ ആന്തരീകഘടകങ്ങളിലും ആവശ്യത്തിന് ഓക്സിജനെത്തും.
ആറ്…
ആദ്യമേ സൂചിപ്പിച്ചത് പോലെ ചെവിയുമായി ബന്ധപ്പെട്ട പ്രശ്നങ്ങള് അനുഭവപ്പെട്ടാല് പോലും അധികപേരും ഇത് കാര്യമായി എടുക്കാതിരിക്കാറുണ്ട്. ഇങ്ങനെ നിസാരവത്കരിക്കുന്ന ഒരു പ്രശ്നം ഭാവിയില് കൂടുതല് സങ്കീര്ണമാകാം. അതിനാല് ചെറിയ പ്രശ്നങ്ങള് നേരിട്ടാല് തന്നെ ആവശ്യമായ പരിശോധനകള് നടത്തുക. കഴിയുമെങ്കില് കൃത്യമായ ഇടവേളകളില് ചെവിയുടെ ആരോഗ്യം പരിശോധിച്ച് ഉറപ്പുവരുത്തുകയും ചെയ്യാം.
