കൊച്ചി : പെരിയ ഇരട്ടക്കൊലക്കേസിലെ പ്രതികളുടെ ജയില്‍ മാറ്റം വേണമെന്ന അപേക്ഷ എറണാകുളം സിജെഎം കോടതി ഇന്ന് പരിഗണിക്കും. നിലവില്‍ പ്രതികള്‍ കണ്ണൂര്‍ സെന്‍ട്രല്‍ ജയിലിലും കാക്കനാട് ജയിലിലും ആണ് ഉള്ളത്. ഇതില്‍ കണ്ണൂര്‍ സെന്‍ട്രല്‍ ജയിലില്‍ ഉള്ള ഒന്നാം പ്രതി ഉള്‍പ്പടെ 11 പേരെ കാക്കനാട് ജയിലിലേക്ക് മാറ്റണമെന്ന് സിബിഐ അന്വേഷണ സംഘം കോടതിയില്‍ ആവശ്യപ്പെട്ടിട്ടുണ്ട്. കാക്കനാട് ജയിലില്‍ കഴിയുന്ന സി.പി.എം എച്ചിലടുക്കം ബ്രാഞ്ച് സെക്രട്ടറി പി. രാജേഷ്, പാര്‍ട്ടി പ്രവര്‍ത്തകരായ വിഷ്ണു സുര, ശാസ്താമധു, റെജി വര്‍ഗീസ്, ഹരിപ്രസാദ്, എന്നിവര്‍ കണ്ണൂര്‍ സെന്‍ട്രല്‍ ജയിലിലേക്ക് മാറ്റണമെന്നാവശ്യപ്പെട്ട് അപേക്ഷ നല്‍കിയിട്ടുണ്ട്.
ഈ രണ്ട് അപേക്ഷകളും ആണ് ഇന്ന് പരിഗണിക്കുക. ഡിസംബര്‍ 30ന് കേസ് എടുത്തെങ്കിലും അപേക്ഷകള്‍ ഇന്നത്തേക്ക് പരിഗണിക്കാന്‍ മാറ്റുകയായിരുന്നു. കേസില്‍ വിവിധ ജയിലുകളില്‍ കഴിയുന്നവരുടെ റിമാന്‍ഡ് കാലാവധി ഇന്ന് തീരുകയാണ്. ഇവരെ ഇന്ന് കോടതിയില്‍ ഹാജരാക്കും. കേസില്‍ ആകെ 24 പ്രതികളാണുള്ളത്.
