ന്യൂഡല്ഹി: ഡല്ഹി ഇന്ദിരാഗാന്ധി അന്താരാഷ്ട്ര വിമാനത്താവളത്തില് കസ്റ്റംസിന്റെ സ്വര്ണവേട്ട. ടെര്മിനല് 2-ല് എത്തിയ വിമാനത്തില്നിന്നാണ് രണ്ടുകോടിയോളം രൂപ വിലവരുന്ന സ്വര്ണം പിടിച്ചെടുത്തത്. വിമാനത്തിലെ ശൗചാലയത്തില് കവറില് പൊതിഞ്ഞനിലയിലായിരുന്നു സ്വര്ണം ഒളിപ്പിച്ചിരുന്നത്.നേരത്തെ ലഭിച്ച രഹസ്യവിവരത്തിന്റെ അടിസ്ഥാനത്തിലാണ് കസ്റ്റംസ് സംഘം വിമാനത്തിനുള്ളില് പരിശോധന നടത്തിയത്. തുടര്ന്നാണ് ശൗചാലയത്തില്നിന്ന് നാല് സ്വര്ണക്കട്ടികള് കണ്ടെടുത്തത്. സംഭവത്തില് കേസെടുത്ത് അന്വേഷണം ആരംഭിച്ചതായി കസ്റ്റംസ് അറിയിച്ചു.
