ഇടുക്കി; ഇരുമ്പുപാലം സര്‍ക്കാര്‍ എല്‍പി സ്‌കൂളിലെ സഹ അധ്യാപകന്‍ അപമര്യാദയായി പെരുമാറിയെന്ന പരാതിയുമായി അധ്യാപിക. വിദ്യാര്‍ത്ഥികളുടെ മുന്നില്‍ വെച്ച് സഹ അധ്യാപകന്‍ അപമര്യാദയായി പെരുമാറിയെന്നാണ് പരാതി. സ്‌കൂളിലെ സീനിയര്‍ അസിസ്റ്റന്റായ ഷെമീമിനെതിരെയാണ് പരാതി. ഷമീം മോശമായി പെരുമാറിയെന്ന് താത്കാലിക അധ്യാപിക നേരത്തെ തന്നെ ഹെഡ്മാസ്റ്റര്‍ക്ക് പരാതി നല്‍കിയിരുന്നു. ഇതിനെ തുടര്‍ന്ന് അധ്യാപിക ക്ലാസെടുത്തുകൊണ്ടിരിക്കെ ഷമീം അക്രമിക്കുകയായിരുന്നു. അധ്യാപികയുടെ പരാതിയില്‍ അടിമാലി പോലീസ് കേസെടുത്ത് അന്വേഷണം തുടങ്ങി. ആരോപിതനായ അധ്യാപകന്‍ ഒളിവിലാണ്.
വിദ്യാര്‍ത്ഥികളുടെ മുന്നില്‍ വെച്ച് സഹ അധ്യാപകന്‍ ഷാള്‍ വലിച്ചുകീറി അപമാനിച്ചുവെന്നാണ് പരാതി. കഴിഞ്ഞ ഫെബ്രുവരി പതിനഞ്ചിനായിരുന്നു സംഭവം. സംഭവത്തില്‍ പോലീസ് പട്ടിക ജാതി പട്ടിക വര്‍ഗ പീഡന നിരോധന നിയമത്തിലെ വകുപ്പുകള്‍ അടക്കം ചേരര്‍ത്ത് കേസെടുത്തിരുന്നു. എന്നാല്‍ പ്രതിയെ ഒരു മാസത്തോളം കഴിഞ്ഞിട്ടും പിടികൂടാനായില്ല. പ്രതിയെ പിടിക്കാന്‍ പോലീസ് ശ്രമിക്കുന്നില്ലെന്നാണ് അധ്യാപികയുടെ പരാതി.
