അസംഗഢ്: കോളജ് ടോയ്ലറ്റിലെ വാട്ടർ ടാപ്പുകൾ നിരന്തരം മോഷണം പോകുന്നത് തടയാൻ ടോയ്ലറ്റിലേക്ക് തിരിച്ച് സി.സി.ടി.വി കാമറ സ്ഥാപിച്ച് കോളജ് അധികൃതർ. ഉത്തർ പ്രദേശിലെ അസംഗഢ് ഡി.എ.വി പി.ജി കോളജിലാണ് സംഭവം. ഇതിനെതിരെ രംഗത്തുവന്ന വിദ്യാർഥികൾ, സ്വകാര്യതക്ക് മേലുള്ള കടന്നുകയറ്റമെന്ന വിമർശനവുമായി പ്രിൻസിപ്പൽ ഓഫിസിന് മുമ്പിൽ സമരം സംഘടിപ്പിച്ചു.
ഇതോടെ ക്ഷമാപണവുമായി കോളജ് മാനേജ്മെന്റ് രംഗത്തെത്തി. കാമ്പസിലെ വാട്ടർ ടാപ്പുകൾ പതിവായി മോഷണം പോകുന്നതിനാലാണ് കാമറ സ്ഥാപിച്ചതെന്നും ഇതിലൊന്ന് അബദ്ധവശാൽ ടോയ്ലറ്റിലേക്ക് തിരിച്ചുവെക്കുകയായിരുന്നെന്നും വിശദീകരിച്ച കോളജ് അധികൃതർ, ഇത് മാറ്റി സ്ഥാപിക്കാൻ നിർദേശം നൽകിയിട്ടുണ്ടെന്നും പറഞ്ഞു. കാമറ മാറ്റുമെന്ന ഉറപ്പിനെ തുടർന്നാണ് വിദ്യാർഥികൾ പ്രതിഷേധം അവസാനിപ്പിച്ചത്.
