തിരുവനന്തപുരം> പഠനത്തോടൊപ്പം വരുമാനം എന്ന ആശയവുമായി ക്യാമ്പസുകളെ ഉല്പാദനകേന്ദ്രങ്ങളാക്കി മാറ്റി വിദ്യാര്ത്ഥികള്ക്ക് വരുമാനമാര്ഗ്ഗം കണ്ടെത്താന് ഗവ.പോളിടെക്നിക്ക് കോളേജുകളില് നടപ്പിലാക്കുന്ന ‘ഇന്ഡസ്ട്രി ഓണ് ക്യാമ്പസ്’ പദ്ധതി ലോകശ്രദ്ധയിൽ വന്നുതുടങ്ങിയതായി ഉന്നതവിദ്യാഭ്യാസ-സാമൂഹ്യനീതി മന്ത്രി ഡോ.ആർ ബിന്ദു പറഞ്ഞു. വൈദ്യുത വാഹനങ്ങളുടെ അസംബ്ലിങ് അടക്കം ‘ഇൻഡസ്ട്രി ഓൺ ക്യാമ്പസ്’ പദ്ധതി ക്യാമ്പസിനുള്ളിൽ സാധ്യമാക്കിയതിന് ആറ്റിങ്ങൽ ഗവ. പോളിടെക്നിക് കോളേജിന് അന്താരാഷ്ട്ര അംഗീകാരം ലഭിച്ചതായി മന്ത്രി അറിയിച്ചു.
വൈദ്യുത വാഹനങ്ങളുടെയും പബ്ലിക് ഇൻഫർമേഷൻ സംവിധാനത്തിന്റെയും അസംബ്ലിങ്ങാണ് ആറ്റിങ്ങൽ പോളി ക്യാമ്പസിനുള്ളിൽ സാധ്യമാക്കിയത്. ഇന്ത്യയും ഓസ്ട്രേലിയയും ആസ്ഥാനമാക്കി പ്രവർത്തിക്കുന്ന ഇന്റർനാഷണൽ ഇൻസ്റ്റിറ്റ്യൂട്ട് ഓഫ് ഓർഗനൈസ്ഡ് റിസർച്ച് സ്ഥാപനമാണ് ഈ നേട്ടത്തിന് അംഗീകാരം നൽകിയത്.
കോളേജിലെ മുഴുവൻ വിദ്യാർത്ഥികൾക്കും വരും നാളുകളിൽ സഹായധനം ലഭ്യമാകുന്നതിനുള്ള സാഹചര്യമാണ് ‘ഇന്നവർ എൻ പോളി’ എന്ന, ഇവിടെ നടപ്പാക്കിക്കൊണ്ടിരിക്കുന്ന പദ്ധതി വഴി കോളേജിൽ ഉണ്ടാകുന്നത്. രാജ്യത്താദ്യമായി ക്യാമ്പസിനുള്ളിൽ പദ്ധതി വിജയകരമായി നടപ്പാക്കുന്നതിന് നേതൃത്വം നൽകിയ ഷാജിൽ അന്ത്രുവിന് മികച്ച പ്രിൻസിപ്പലെന്ന അംഗീകാരവും ഇതോടൊപ്പം ലഭിച്ചു.കേരളത്തിലെ ഉന്നതവിദ്യാഭ്യാസ സ്ഥാപനങ്ങൾക്കാകെ ആവേശവും പ്രചോദനവും നൽകുന്ന നേട്ടമാണിത് – മന്ത്രി ഡോ ആർ ബിന്ദു പറഞ്ഞു.
