തിരുവനന്തപുരം ∙ സംസ്ഥാനത്ത് ഏപ്രിൽ 1 മുതല് ഹെല്ത്ത് കാര്ഡ് നിര്ബന്ധമെന്ന് ആരോഗ്യമന്ത്രി വീണാ ജോര്ജ്. ഭക്ഷ്യ സ്ഥാപനങ്ങളുടെയും സംഘടനകളുടെയും അഭ്യർഥന മാനിച്ച് നിരവധി തവണ ഹെല്ത്ത് കാര്ഡെടുക്കാന് സാവകാശം നല്കിയിരുന്നു. കാരുണ്യ ഫാര്മസികള് വഴി വളരെ കുറഞ്ഞ വിലയില് ടൈഫോയ്ഡ് വാക്സീന് ലഭ്യമാക്കി. ഇനി കര്ശനമായ പരിശോധന തുടരും. ഹോട്ടലുകള്, റസ്റ്ററന്റുകള് തുടങ്ങി എല്ലാ ഭക്ഷ്യ സ്ഥാപനങ്ങളും ജീവനക്കാര്ക്ക് ഹെല്ത്ത് കാര്ഡ് ഉറപ്പാക്കണമെന്നും മന്ത്രി അഭ്യർഥിച്ചു.
മന്ത്രി വീണാ ജോര്ജിന്റെ ഇടപെടലിനെ തുടര്ന്ന് പൊതുവിപണിയില് 350 രൂപ മുതല് 2000 രൂപയ്ക്ക് മുകളില് വരെ വിലയുള്ള ടൈഫോയ്ഡ് വാക്സീന് കാരുണ്യ ഫാര്മസികള് വഴി 95.52 രൂപയിലാണ് കെഎംഎസ്സിഎൽ ലഭ്യമാക്കിയിട്ടുള്ളത്. പൊതുജനങ്ങള്ക്ക് ഭക്ഷ്യസുരക്ഷാ പരാതികള് നേരിട്ടറിയിക്കാന് സംസ്ഥാന ഭക്ഷ്യ സുരക്ഷാ വകുപ്പ് ഗ്രിവന്സ് പോര്ട്ടല് സജ്ജമാക്കി. പരാതിയിന്മേല് എടുത്ത നടപടികളും ഇതിലൂടെ അറിയാന് സാധിക്കും.
പരാതി സംബന്ധിച്ച ഫോട്ടോയും വിഡിയോയും അപ്ലോഡ് ചെയ്യാനുമാകും. ഈ പോര്ട്ടല് വഴി ഇതുവരെ 108 പരാതികളാണ് ലഭ്യമായത്. ഇതില് 30 പരാതികളില് നടപടിയെടുത്തു. അടുത്തിടെ കിട്ടിയ ബാക്കി പരാതികളില് നടപടികള് സ്വീകരിച്ചു വരുന്നു. സംസ്ഥാനത്ത് ഭക്ഷ്യസുരക്ഷ പരിശോധനകള് ശക്തമായി നടക്കുന്നുണ്ട്. വ്യാഴാഴ്ച മാത്രം 205 പരിശോധനകളാണ് സ്പെഷല് സ്ക്വാഡ് നടത്തിയത്. 21 സ്ഥാപനങ്ങള്ക്ക് നോട്ടിസ് നല്കി.
