നോയിഡ: പബ്ബിലെ ഡിജെ പാര്‍ട്ടിയില്‍ രാമായണ സീരിയലിലെ ദൃശ്യങ്ങള്‍ ഡബ്ബ് ചെയ്ത് പ്രദര്‍ശിപ്പിച്ചതിന് രണ്ടുപേര്‍ അറസ്റ്റില്‍. നോയിഡയിലെ ഗാര്‍ഡന്‍സ് ഗലേറിയ മാളിലെ പബ്ബിലാണ് സംഭവം. ലോര്‍ഡ് ഓഫ് ഡ്രിങ്ക്സ് പബ്ബിന്റെ ഉടമയും മാനേജറുമാണ് അറസ്റ്റിലായത്. ഇവര്‍ക്കെതിരെ പരാതിയൊന്നും ലഭിച്ചില്ലെങ്കിലും സോഷ്യല്‍ മീഡിയ പോസ്റ്റുകള്‍ കണ്ട് സ്വമേധയാ കേസെടുത്തതായി നോയിഡ പോലീസ് പറഞ്ഞു. വിവിധ ഗ്രൂപ്പുകള്‍ക്കിടയില്‍ ശത്രുത വളര്‍ത്തിയതിനും മതവികാരം വ്രണപ്പെടുത്തിയതിനും ഉടമ മനക് ചൗധരി, മാനേജര്‍ അഭിഷേക് എന്നിവരെ തിങ്കളാഴ്ച അറസ്റ്റ് ചെയ്തതായി പോലീസ് വ്യക്തമാക്കി. സീരിയലിലെ യഥാര്‍ഥ സംഭാഷണം മാറ്റി, ഡബ്ബ് ചെയ്ത് ചേര്‍ത്ത് പാട്ടിനൊപ്പം ഡി.ജെക്കിടെ പ്രദര്‍ശിപ്പിക്കുകയായിരുന്നു.
