കാസര്‍ഗോഡ്: കാസര്‍ഗോഡ് അഡൂര്‍ ദേവറടുക്കയില്‍ പുഴയില്‍ കുളിക്കാനിറങ്ങിയ രണ്ട് കുട്ടികള്‍ മുങ്ങി മരിച്ചു. ദേവറടുക്കയിലെ മുഹമ്മദ് ആഷിഖ് (ഏഴ്), മുഹമ്മദ് ഫാസില്‍ (9) എന്നിവരാണ് മരിച്ചത്. ഉച്ചക്ക് ഒന്നരയോടെയാണ് അപകടം. കുട്ടികള്‍ മുങ്ങിത്താഴുന്നത് കണ്ട് പുഴക്കരയില്‍ ഉണ്ടായിരുന്ന മറ്റ് കുട്ടികള്‍ നാട്ടുകാരെ വിവരം അറിയിക്കുകയായിരുന്നു. മുഹമ്മദ് ആഷിഖിനെ ആദ്യം പുറത്തെടുത്തുവെങ്കിലും ഫാസിലിനെ തിരച്ചലിനൊടുവിലാണ് കണ്ടെത്തിയത്. ഉടന്‍ മുള്ളേരിയ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. മൃതദേഹങ്ങള്‍ കാസര്‍ഗോഡ് ജനറല്‍ ആശുപത്രിയിലേക്ക് മാറ്റി.
