തിരുവനന്തപുരം : സംസ്ഥാനത്ത് സ്കൂളുകളുടെ പ്രവര്ത്തനം സംബന്ധിച്ചുള്ള വിശദമായ മാര്ഗ രേഖ മറ്റന്നാള് പുറത്തിററക്കും. ഒന്ന് മുതല് ഒന്പത് വരെ ഉള്ള ക്ലാസുകള് 21 മുതല് രണ്ടാഴ്ച്ച അടച്ചിടാനാണ് തീരുമാനം. പത്ത്, പതിനൊന്ന്, പന്ത്രണ്ട് ക്ലാസുകള് ഓഫ് ലൈന് ആയി തുടരും. ക്ലാസ് സമയവും എത്ര കുട്ടികളെ പ്രവേശിപ്പിക്കണം എന്നതും മാര്ഗ്ഗ രേഖയില് പറയും. ഒന്ന് മുതല് ഒന്പത് വരെ ഉള്ള ഓണ്ലൈന് ക്ലാസ്സിന്റെ വിശദാംശകളും ഇറക്കും. കൊവിഡ് വ്യാപനം രൂക്ഷമായ സാഹചര്യത്തില് ടിപിആര് 20ന് മുകളിലുള്ള ജില്ലകളില് സാമുദായിക-സാംസ്ക്കാരിക പരിപാടികളില് പങ്കെടുക്കുന്നവരുടെ എണ്ണം 50 ആക്കി ചുരുക്കിയിട്ടുണ്ട്. എന്നാല്, ഇതില് രാഷ്ട്രീയപരിപാടികളുടെ ഉള്പ്പെടുത്തിയില്ല എന്നുള്ളതാണ് ശ്രദ്ധേയം. സിപിഎം സമ്മേളനങ്ങള് നടക്കുന്ന സാഹചര്യത്തിലാണിതെന്നാണ് ആക്ഷേപം ഉയര്ന്നിരുന്നു. ഇതിന് പിന്നാലെയാണ് പൊതുസമ്മേളനങ്ങള് മാറ്റിയത്. ടിപിആര് 30 ല് കൂടുന്ന ജില്ലകളില് പൊതുപരിപാടികള്ക്ക് അനുവാദമില്ല. മാളുകളിലും നിയന്ത്രണമുണ്ട്.
ഒമ്പതാം ക്ലാസ് വരെ ജനുവരി 21 മുതല് രണ്ടാഴ്ചക്കാലം ഓണ്ലൈന് സംവിധാനത്തിലൂടെ നടത്തിയാല് മതിയെന്ന് മുഖ്യമന്ത്രി പിണറായി വിജയന്റെ അധ്യക്ഷതയില് ഇന്നലെ ചേര്ന്ന കൊവിഡ് അവലോകന യോഗം തീരുമാനിച്ചു. ഫെബ്രുവരി രണ്ടാം വാരം ഇത് തുടരണമോയെന്ന് പരിശോധിക്കും. വിദ്യാഭ്യാസ സ്ഥാപനങ്ങളില് ക്ലസ്റ്ററുകള് രൂപപ്പെട്ടാല് രണ്ടാഴ്ചവരെ അടച്ചിടാന് പ്രിന്സിപ്പല്/ഹെഡ്മാസ്റ്റര്ക്ക് അധികാരം നല്കും. സംസ്ഥാനത്ത് തിരുവനന്തപുരം, എറണാകുളം ജില്ലകളിലാണ് കൊവിഡ് വ്യാപനം ഏറ്റവും അധികമുള്ളത്. കൊവിഡുമായി ബന്ധപ്പെട്ട ഡാറ്റാ കൊവിഡ് ജാഗ്രതാ പോര്ട്ടലിലൂടെ ആരോഗ്യ വകുപ്പ് പൊലീസ്, തദ്ദേശ സ്വയംഭരണം, റവന്യൂ തുടങ്ങി ബന്ധപ്പെട്ട വകുപ്പുകള്ക്ക് ലഭ്യമാക്കേണ്ടതാണ്.
കൊവിഡ് ക്ലസ്റ്ററുകള് കണ്ടെത്തി ആവശ്യമായ നിയന്ത്രണങ്ങള് ഏര്പ്പെടുത്താന് ജില്ലാ കളക്ടര്മാരോട് മുഖ്യമന്ത്രി നിര്ദ്ദേശിച്ചു. സര്ക്കാര് ഓഫീസുകളില് ജോലി ചെയ്യുന്ന ഗര്ഭിണികള്ക്ക് വര്ക്ക് ഫ്രം ഹോം സംവിധാനം അനുവദിക്കും. സര്ക്കാര്, അര്ദ്ധ സര്ക്കാര്, പൊതുമേഖലാ സ്ഥാപനങ്ങള്, സഹകരണ സ്ഥാപനങ്ങള് എന്നിവിടങ്ങളിലേതുള്പ്പെടെ എല്ലാ ഔദ്യോഗിക പരിപാടികളും ചടങ്ങുകളും ഓണ്ലൈന് ആയി നടത്തേണ്ടതാണ്. ടെസ്റ്റ് പോസിറ്റിവിറ്റി നിരക്ക് 20 ല് കൂടുതലുള്ള ജില്ലകളില് സാമൂഹ്യ, സാംസ്കാരിക, സാമുദായിക പരിപാടികള്ക്കും വിവാഹം, മരണാനന്തര ചടങ്ങുകള് എന്നിവയുടേത് പോലെ 50 പേരായി പരിമിതപ്പെടുത്തും. കൂടുതല് പേര് പങ്കെടുക്കേണ്ട നിര്ബന്ധിത സാഹചര്യങ്ങളില് പ്രത്യേക അനുവാദം വാങ്ങണം. ടെസ്റ്റ് പോസിറ്റിവിറ്റി നിരക്ക് 30 ല് കൂടുതല് വന്നാല് പൊതുപരിപാടികള് നടത്താന് അനുവദിക്കില്ല.
എല്ലാ വ്യാപാര സ്ഥാപനങ്ങളും ഓണ്ലൈന് ബുക്കിങ്ങും വില്പ്പനയും പ്രോത്സാഹിപ്പിക്കേണ്ടതാണ്. മാളുകളില് ജനത്തിരക്ക് ഉണ്ടാകാത്ത രീതിയില് 25 സ്ക്വയര് ഫീറ്റിന് ഒരാളെന്ന നിലയില് നിശ്ചയിക്കേണ്ടതും അതനുസരിച്ചു മാത്രം ആളുകളെ പ്രവേശിപ്പിക്കേണ്ടതുമാണ്. ഇത് ജില്ലാ ഭരണ കൂടം ഉറപ്പു വരുത്തണം. കൊവിഡ് വ്യാപനം വര്ദ്ധിച്ച സാഹചര്യത്തില് ശബരിമലയില് ജനുവരി 16 മുതല് നേരത്തെ ഓണ്ലൈന് ബുക്കിംഗ് ചെയ്തവര്ക്ക് സന്ദര്ശനം മാറ്റി വെയ്ക്കാന് അഭ്യര്ത്ഥിച്ച് സന്ദേശം അയക്കാന് ബന്ധപ്പെട്ട വകുപ്പിനോട് മുഖ്യമന്ത്രി നിര്ദ്ദേശിച്ചു. പ്രവേശിപ്പിക്കാവുന്നവരുടെ എണ്ണം ചര്ച്ചയിലൂടെ നിശ്ചയിക്കും.
ഒമിക്രോണ് വ്യാപിക്കുന്ന സാഹചര്യത്തില് ആരോഗ്യ വകുപ്പ് ആവശ്യമായ മുന്കരുതലുകള് എടുക്കുന്നുണ്ട്. ജില്ലകളില് കൂടുതല് സൗകര്യങ്ങള് ഒരുക്കുന്നുണ്ട്. നിലവിലെ കൊവിഡ് വ്യാപന സാഹചര്യത്തില് വാര്ഡ് തല സമിതികളുടെ സഹകരണം അനിവാര്യമാണ്. 10, 11, 12 ക്ലാസുകളിലെ കുട്ടികള്ക്ക് വാക്സിന് സ്കൂളില് പോയി കൊടുക്കാന് ആരോഗ്യ, വിദ്യാഭ്യാസ വകുപ്പുകള് ഏകോപിച്ച് മുന്കൈയെടുക്കണമെന്നും മുഖ്യമന്ത്രി നിര്ദ്ദേശിച്ചു.
