ലഖ്‌നൗ: ഉത്തര്‍പ്രദേശിലെ ശ്രാവസ്തിയില്‍ കാര്‍ അപകടത്തില്‍ ഒരു കുടുംബത്തിലെ ആറുപേര്‍ മരിച്ചു. ബന്ധുവിന്റെ സംസ്‌കാര ചടങ്ങില്‍ പങ്കെടുത്ത് മടങ്ങവെ ആയിരുന്നു അപകടം. കാര്‍ മരത്തില്‍ ഇടിച്ചുണ്ടായ അപകടത്തില്‍ എട്ടുപേര്‍ക്ക് പരിക്കേല്‍ക്കുകയും ചെയ്തു. ശനിയാഴ്ച പുലര്‍ച്ചെയാണ് വാഹനാപകടം നടന്നത്. കാര്‍ നിയന്ത്രണം വിട്ട് സുന്ദരൈ ഗ്രാമത്തിന് സമീപം മരത്തിലിടിച്ചാണ് അപകടമുണ്ടായത്. സംഭവമറിഞ്ഞെത്തിയ പോലീസ് ജെ സി ബിയുടെ സഹായത്തോടെ കാര്‍ കുഴിയില്‍ നിന്ന് പുറത്തെടുത്ത് രക്ഷാപ്രവര്‍ത്തനം നടത്തി. ഇവരെ അടുത്തുള്ള കമ്മ്യൂണിറ്റി ഹെല്‍ത്ത് സെന്ററിലാണ് എത്തിച്ചത്. ആറ് പേര്‍ മരിച്ചതായി ഡോക്ടര്‍മാര്‍ അറിയിച്ചു.
