മലപ്പുറം: വയോധികയെ പറഞ്ഞ് പറ്റിച്ച് സ്വര്‍ണവും പണവും തട്ടിയെടുത്ത കേസില്‍ അബ്ദുള്‍ അസീസ് എന്ന അറബി അസീസ് (40) പിടിയില്‍. മലപ്പുറം വഴിക്കടവ് വയോധികയെ മകളുടെ വിവാഹത്തിന് സഹായിക്കാമെന്നു പറഞ്ഞു വിശ്വസിപ്പിച്ച് രണ്ടു പവന്‍ സ്വര്‍ണ്ണാഭരണവും 6000 രൂപയും തട്ടിയെടുത്ത കേസിലെ പ്രതിയാണ് ഇയാള്‍. വഴിക്കടവ് പോലീസാണ് ഇയാളെ പിടികൂടിയത്.
പൂവ്വത്തിപൊയില്‍ സ്വദേശിയായ വയോധികയുടെ പരാതിയിലാണ അസീസിനെ അറസ്റ്റ് ചെയ്തത്. പിടിയിലായ അസീസിന്റെ പേരില്‍ വിവിധ സ്റ്റേഷനുകളില്‍ പിടിച്ചുപറി, തട്ടികൊണ്ടു പോകല്‍, ബലാത്സംഗം തുടങ്ങിയ കേസുകളും പത്തോളം കഞ്ചാവ് കേസുകളുമുണ്ട്. സമ്പന്നന്‍ ആയ അറബിയില്‍ നിന്നും സാമ്പത്തിക സഹായം ശരിയാക്കി തരാമെന്ന് പറഞ്ഞ് തട്ടിപ്പ് നടത്തി സ്വര്‍ണ്ണം കവര്‍ച്ച ചെയ്യുന്നതാണ് അസീസിന്റെ രീതി. അറബി കാണുമ്പോള്‍ സ്വര്‍ണ്ണം പാടില്ലന്നു പറഞ്ഞ് സ്ത്രീകളില്‍ നിന്നും സ്വര്‍ണം ഊരി വാങ്ങും. പിന്നീട് അതുമായി മുങ്ങും. പല സ്ത്രീകളെ ലൈംഗികമായി ഉപയോഗിക്കുകയും പിന്നീട് അവരില്‍ നിന്നും സ്വര്‍ണം തട്ടിയെടുക്കുകയും ചെയ്തതായും പരാതിയുണ്ട്.
