ന്യൂഡൽഹി∙ സർക്കാർ സ്ഥാപനങ്ങൾക്കു പുറമേ സ്വകാര്യ സ്ഥാപനങ്ങൾക്കും ആധാർ ഉപയോഗിക്കാൻ (ഓതന്റിക്കേഷൻ) അവസരമൊരുങ്ങുന്നു. ഇതു സംബന്ധിച്ച കരട് ഭേദഗതിയിന്മേൽ കേന്ദ്ര ഐടി മന്ത്രാലയം പൊതുജനാഭിപ്രായം തേടി. നിലവിൽ സർക്കാർ വകുപ്പുകൾ/മന്ത്രാലയങ്ങൾ, ടെലികോം, ബാങ്കിങ് സ്ഥാപനങ്ങൾ തുടങ്ങിയവയ്ക്കാണ് ആധാർ ഓതന്റിക്കേഷൻ നടത്താൻ അനുമതിയുള്ളത്.
കരടുഭേദഗതി നടപ്പായാൽ ഏത് സ്വകാര്യസ്ഥാപനത്തിനും ആധാർ ഉപയോഗിക്കാൻ വഴിയൊരുങ്ങും. ഡിജിറ്റൽ പ്ലാറ്റ്ഫോമുകളിലൂടെ സദ്ഭരണം ഉറപ്പാക്കൽ, സാമൂഹിക സുരക്ഷാ ആനുകൂല്യങ്ങൾ പാഴാക്കുന്നത് തടയുക, ഇന്നവേഷൻ പ്രോത്സാഹിപ്പിക്കുക തുടങ്ങിയ കാര്യങ്ങൾക്കാണ് നിലവിൽ ആധാർ ഉപയോഗിക്കാൻ അനുമതിയുള്ളത്. ജീവിതം കൂടുതൽ എളുപ്പമാക്കുന്നതിനും (ഈസ് ഓഫ് ലിവിങ്) മെച്ചപ്പെട്ട സേവനങ്ങൾ നൽകുന്നതിനും ആധാർ ഉപയോഗിക്കാൻ കരടുഭേദഗതിയിൽ വ്യവസ്ഥ ഉൾച്ചേർത്തു.
ഇവയിലേതെങ്കിലുമൊരു കാര്യത്തിന് ഒരു സ്വകാര്യ സ്ഥാപനത്തിന് ആധാർ ഉപയോഗിക്കാൻ താൽപര്യമുണ്ടെങ്കിൽ ആ മേഖലയുമായി ബന്ധപ്പെട്ട സംസ്ഥാന/കേന്ദ്ര സർക്കാർ വകുപ്പിന് അപേക്ഷ നൽകാം. ആവശ്യം ന്യായമെന്ന് കണ്ടാൽ ഇത് അംഗീകാരത്തിനായി കേന്ദ്രത്തിനും ആധാർ അതോറിറ്റിക്കും (യുഐഡിഎഐ) കൈമാറും. മേയ് 5 വരെ അഭിപ്രായം അറിയിക്കാം. ലിങ്ക്: bit.ly/uidaiamend
എന്താണ് ആധാർ ഓതന്റിക്കേഷൻ?
വിവിധ സർക്കാർ സേവനങ്ങൾക്ക് ഓൺലൈനായി റജിസ്റ്റർ ചെയ്യുമ്പോൾ ആധാർ നമ്പറും ഫോണിൽ വരുന്ന ഒടിപിയും നൽകി വെരിഫൈ ചെയ്യുന്നതും, റേഷൻ വാങ്ങാൻ വിരലടയാളം (ബയോമെട്രിക്സ്) പതിപ്പിക്കുന്നതുമൊക്കെ ആധാർ ഓതന്റിക്കേഷന്റെ ഉദാഹരണങ്ങളാണ്. ആധാർ നമ്പറോ ബയോമെട്രിക് വിവരങ്ങളോ ഓൺലൈനായി നൽകി അതിന്റെ ആധികാരികത ആധാർ സെൻട്രൽ ഐഡന്റിറ്റീസ് ഡേറ്റ റിപ്പോസിറ്ററിയുടെ (സിഐഡിആർ) സഹായത്തോടെ ഉറപ്പുവരുത്തുന്നതിനെയാണ് ഓതന്റിക്കേഷൻ എന്നു വിളിക്കുന്നത്.
