ഡെറാഡൂൺ∙ സൂപ്പർ ബൈക്കിൽ 300 കി.മീ. വേഗമെടുത്തത് ചിത്രീകരിക്കുന്നതിനിടെയുണ്ടായ അപകടത്തിൽ യുട്യൂബർ അഗസ്ത്യ ചൗഹാൻ മരിച്ചു. യമുനാ എക്സ്പ്രസ് ഹൈവേയിൽ, ആഗ്രയിൽ നിന്നും ന്യൂഡൽഹിയിലേക്ക് വരുമ്പോഴായിരുന്നു അപകടം. യൂട്യൂബിൽ പ്രൊ റൈഡർ 1000 എന്ന പേരിൽ ചാനൽ നടത്തുന്ന അഗസ്ത്യ ചൗഹാനെ 12 ലക്ഷം പേരാണ് പിന്തുടരുന്നത്. യമുന എക്സ്പ്രസ് ഹൈവേയിലെ വേഗപ്പാച്ചിലിനിടെ ഡിവൈഡറിലിടിച്ചുണ്ടായ അപകടത്തിലാണ് മരണമെന്നാണ് റിപ്പോർട്ടുകൾ. ഇദ്ദേഹം ധരിച്ചിരുന്ന ക്യാമറയുള്ള ഹെൽമറ്റ് ചിന്നിച്ചിതറിയ നിലയിലായിരുന്നു. ഒടുവിൽ അപ്ലോഡ് ചെയ്ത വിഡിയോയിൽ എങ്ങനെ ബൈക്കിൽ വേഗത്തിൽ ഡൽഹിയിൽ എത്താം എന്നതാണ് അപ്ലോഡ് ചെയ്തിരുന്നത്. താൻ 300 കി.മീ വേഗമെടുക്കുമെന്നും, പറ്റിയാൽ അതിനുമപ്പുറം വേഗതയിൽ പോകുമെന്നും വിഡിയോയിൽ പറയുന്നുണ്ട്.
പൊതുമധ്യത്തിൽ ജനങ്ങൾക്ക് അപകടകരമായ രീതിയിൽ ബൈക്കോടിക്കുന്നെന്ന് ഡെറാഡൂൺ ട്രാഫിക് പൊലീസ് കണ്ടെത്തിയ 12 പേരിൽ ഒരാളായിരുന്നു അഗസ്ത്യ ചൗഹാൻ. ഇയാളുടെ ഇൻസ്റ്റാഗ്രാം പേജിൽ ഇത്തരത്തിൽ അപകടകരമായ രീതിയിൽ ബൈക്ക് ഓടിക്കരുതെന്ന കമന്റുകളും നിറയുന്നുണ്ട്.
