നെടുങ്കണ്ടം> മീനുകൾക്ക് തീറ്റ കൊടുക്കുന്നതിനിടെ കാൽവഴുതി പടുതാക്കുളത്തിൽ വീണ് വിദ്യാർഥിനി മരിച്ചു. നെടുങ്കണ്ടം കട്ടക്കാല വരിക്കപ്ലാവ് വിളയിൽ സുരേഷിന്റെ മകൾ അനാമിക(16) ആണ് മരിച്ചത്. ബുധൻ രാവിലെ എട്ടോടെയായിരുന്നു അപകടം. അനാമികയെ കാണാതായതിനെ തുടർന്ന് നടത്തിയ തിരച്ചിലിലാണ് പടുതാക്കുളത്തിൽ വീണതായി കണ്ടെത്തിയത്.
ഏറെ നേരമായിട്ടും കുട്ടിയെ കാണാത്തതിനാൽ വീട്ടുകാർ നടത്തിയ തിരച്ചിലിൽ പടുതാക്കുളത്തിലും സമീപത്തും ചെരിപ്പുകൾ കണ്ടെത്തി. വീട്ടുകാർ അലമുറയിട്ടതിനെതുടർന്ന് നാട്ടുകാരെത്തി തിരച്ചിൽനടത്തി. ആദ്യം കുട്ടിയെ കണ്ടെത്താനായില്ല. തുടർന്ന് പടുതാക്കുളത്തിന്റെ ഒരുഭാഗം തകർത്ത് ജലം പുറത്തേക്ക് ഒഴുക്കിവിട്ടു. ഇതോടെ കുട്ടിയെ അടിത്തട്ടിൽ കണ്ടെത്തുകയായിരുന്നു. ഉടൻ നെടുങ്കണ്ടം താലൂക്ക് ആശുപത്രിയിൽ എത്തിച്ചെങ്കിലും മരിച്ചു.
നെടുങ്കണ്ടം വിഎച്ച്എസ്എസിൽ പത്താംക്ലാസ് പരീക്ഷയെഴുതി ഫലം കാത്തിരിക്കുകയായിരുന്നു. നെടുങ്കണ്ടം പൊലീസ് മേൽനടപടികൾ സ്വീകരിച്ചു. പോസ്റ്റ്മോർട്ടത്തിനുശേഷം മൃതദേഹം ബന്ധുക്കൾക്ക് വിട്ടുനൽകി. സംസ്കാരം വ്യാഴം പകൽ 1.30ന് വീട്ടുവളപ്പിൽ. അമ്മ: ജിജി. സഹോദരി: ആഷ്നിയ.
