കൊച്ചി: കൊച്ചി മെട്രോ ഞായറാഴ്ച്ചകളില്‍ സര്‍വ്വീസ് തുടങ്ങുന്ന സമയം പുതുക്കി. മെട്രോ ഇനി ഞായറാഴ്ചകളില്‍ അതിരാവിലെ മുതല്‍ സര്‍വീസ് നടത്തും. ഞായറാഴ്ചകളില്‍ രാവിലെ 7.30 മുതല്‍ കൊച്ചി മെട്രോ സര്‍വീസ് ആരംഭിക്കും. കഴിഞ്ഞ ആഴ്ച്ച നടത്തിയ ഓണ്‍ലൈന്‍ സര്‍വ്വേയില്‍ നിന്ന് ലഭിച്ച അഭിപ്രായങ്ങള്‍ പരിഗണിച്ചാണ് കൊച്ചി മെട്രോ ഞായറാഴ്ച്ചകളിലെ സര്‍വ്വീസ് തുടങ്ങുന്ന സമയം പുതുക്കി നിശ്ചയിച്ചത്.
നിലവില്‍ 8 മണിക്കാണ് ഞായറാഴ്ച്ചകളില്‍ സര്‍വ്വീസ് ആരംഭിച്ചിരുന്നത്. സ്‌കൂളുകള്‍ തുറക്കുന്നതിനോടനുബന്ധിച്ച് വിദ്യാര്‍ത്ഥികള്‍ക്കായി പ്രത്യേക ഓഫറുകളും കൊച്ചി മെട്രോ ഒരുക്കിയിട്ടുണ്ട്. 900 രൂപയ്ക്ക് ഒരു മാസം മുഴുവന്‍ പരിധികളില്ലാതെ യാത്ര ചെയ്യാന്‍ വിദ്യ-30 കാര്‍ഡും 450 രൂപയ്ക്ക് ഒരു മാസത്തേക്ക് മൈബൈക്കിന്റെ സൈക്കിളും കോമ്പോ ഓഫറായി വിദ്യാര്‍ത്ഥികള്‍ക്ക് ലഭിക്കും.
