ആലപ്പുഴ: വാഹന മോഷണ കേകസില് സഹോദരങ്ങളടക്കം 3 പേര് പിടിയില്. മാരാരിക്കുളം റെയില്വേ സ്റ്റേഷന് മുന്വശത്ത് വച്ചിരുന്ന ഒന്നരലക്ഷം രൂപ വില വരുന്ന ബുള്ളറ്റ് മോഷണം പോയതുമായി ബന്ധപ്പെട്ട് അന്വേഷണത്തിലാണ് ഇവരെ പിടികൂടിയത്. തിരുവനന്തപുരം കുട്ടിച്ചല് പഞ്ചായത്ത് ഏഴാം വാര്ഡില് കോട്ടൂര് പി ഒ യില് ചവടമൂട് സൗദ് മന്സില് സൗദ് (24), സഹോദരനായ സബിത്ത് (19), തിരുവനന്തപുരം കരമന, കാലടി കോടല് വീട്ടില് കാര്ത്തിക്ക് (18) എന്നീ പ്രതികളെയാണ് അറസ്റ്റ് ചെയ്തത്.
ബുള്ളറ്റുകളുടെ യാഥാര്ത്ഥ ആര്സി ഉടമസ്ഥരുടെ ഫോണ് നമ്പര്, പരിവാഹന് ഓണ്ലൈന് സൈറ്റിലുടെ മൊബൈല് ഫോണ് അപ്ഡേഷന് നടത്തി മാറ്റിയും, എന്ജിന് നമ്പരിലും, ചെയ്സിസ് നമ്പരിലും മാറ്റങ്ങള് വരുത്തി ആര് സി ബുക്ക് വ്യാജമായി പ്രിന്റ് ചെയ്ത് ഓണ്ലൈനിലൂടെ വില്പന നടത്തുന്നതാണ് പ്രതികളുടെ രീതി. പ്രതികള് എറണാകുളം മരട്, എറണാകുളം സെന്ട്രല്, തിരുവനന്തപുരം പേട്ട, പൂജപ്പുര എന്നീ പോലീസ് സ്റ്റേഷനുകളില് രജിസ്റ്റര് ചെയ്തിരുന്ന ബുളളറ്റ് മോഷണകേസ്സുകളിലെ പ്രതികളാണെന്ന് തെളിഞ്ഞിട്ടുണ്ട്. പ്രതികള് നിലവില് 8 ഓളം ബുള്ളറ്റുകള് മോഷണം ചെയ്തിട്ടുള്ളതായി കണ്ടെത്തിയിട്ടുണ്ട്.
