പുല്പള്ളി ∙ വയനാട്ടില് കടബാധ്യതയെത്തുടർന്നു വീണ്ടും കര്ഷകന് ജീവനൊടുക്കി. പുല്പള്ളി കേളക്കവല കിഴക്കേ ഇടയിളത്ത് രാജേന്ദ്രന് നായര് (60) ആണു ജീവനൊടുക്കിയത്. കടബാധ്യതയെത്തുടര്ന്നാണ് ആത്മഹത്യയെന്നു ബന്ധുക്കള് പറഞ്ഞു. പുല്പള്ളി സര്വീസ് സഹകരണ ബാങ്കില് 35 ലക്ഷം രൂപ വായ്പാകുടിശികയുണ്ടായിരുന്നു.
ജപ്തി നടപടികളിലേക്കു ബാങ്ക് കടന്നതോടെയാണ് ഇദ്ദേഹത്തെ വിഷം കഴിച്ച നിലയില് കണ്ടെത്തിയത്. 3 ദിവസത്തിനിടെ വയനാട്ടില് ആത്മഹത്യ ചെയ്യുന്ന രണ്ടാമത്തെ കര്ഷകനാണ്. തിരുനെല്ലി അരണപ്പാറ സ്വദേശി പി.കെ.തിമ്മപ്പന് (50) എന്ന കര്ഷകന് ഞായറാഴ്ച ജീവനൊടുക്കിയിരുന്നു. മേയ് 3ന് ചെന്നലോട് പുത്തന്പുരക്കല് ദേവസ്യ (49) എന്ന കര്ഷകനും കടബാധ്യതയെത്തുടര്ന്ന് വിഷം കഴിച്ചു മരിച്ചിരുന്നു.
(ശ്രദ്ധിക്കുക: ആത്മഹത്യ ഒന്നിനും പരിഹാരമല്ല. മാനസികാരോഗ്യ വിദഗ്ധരുടെ സഹായം തേടുക, അതിജീവിക്കാൻ ശ്രമിക്കുക. ഹെൽപ്ലൈൻ നമ്പരുകൾ – 1056, 0471- 2552056)
