മാനന്തവാടി : കണിയാരം കത്തീഡ്രൽ പള്ളിസെമിത്തേരിയിലെ കുരിശുകൾ നശിപ്പിക്കുകയും കല്ലറകൾക്ക് കേടുപാടുകൾ വരുത്തുകയും ചെയ്തയാളെ പോലീസ് അറസ്റ്റുചെയ്തു. ചെറുപുഴ വിമലനഗർ പൊന്നാറ്റിൽ ഡോണിഷ് ജോർജാണ് (33) അറസ്റ്റിലായത്. കാൽപ്പാടുകൾ കേന്ദ്രീകരിച്ചുനടത്തിയ അന്വേഷണത്തിലാണ് ഇയാൾ പിടിയിലായത്. ശനിയാഴ്ച രാത്രിയാണ് ഇയാൾ കുരിശുകൾ നശിപ്പിച്ചത്. സെമിത്തേരിക്ക് സമീപത്തെ ക്രൂശിതരൂപം എടുത്തുമാറ്റിയ നിലയിലുമായിരുന്നു. മദ്യലഹരിയിലാണ് ഇയാൾ കുരിശുകൾ നശിപ്പിച്ചതെന്ന് പോലീസ് പറഞ്ഞു. ഡോഗ് സ്ക്വാഡ്, ഫൊറൻസിക് സംഘം, വിരലടയാളവിദഗ്ധരും സ്ഥലത്തെത്തി പരിശോധന നടത്തി. ഇൻസ്പെക്ടർ എം.എം. അബ്ദുൾകരീം, എസ്.ഐ. ബിജു ആന്റണി എന്നിവരുടെ നേതൃത്വത്തിലാണ് പ്രതിയെ പിടികൂടിയത്.
