ദന്താരോഗ്യം അഥവാ പല്ലുകളുടെ ആരോഗ്യം സംരക്ഷിക്കേണ്ടത് ഏറെ പ്രധാനപ്പെട്ട കാര്യമാണ്. ശരീരത്തിന്റെ മൊത്തം ആരോഗ്യം കാത്തുസൂക്ഷിക്കുന്നതിന് കൃത്യമായ ദന്തസംരക്ഷണവും അത്യന്താപേക്ഷിതമാണ്. പല്ല് ദ്രവിക്കലും മോണരോഗങ്ങളും ഉണ്ടാകാനുള്ള കാരണം, കൃത്യമായ രീതിയില് വായ വൃത്തിയാക്കാത്തതുകൊണ്ടാണ്. അതിനാല് രണ്ട് നേരവും പല്ല് തേക്കാന് എല്ലാവരും ശ്രദ്ധിക്കേണ്ടതുണ്ട്. കൂടാതെ ദന്താരോഗ്യത്തിന് പോഷകങ്ങള് അടങ്ങിയ ഭക്ഷണങ്ങള് തന്നെ കഴിക്കണം.
പല്ലുകളുടെ ആരോഗ്യത്തിന് ഡയറ്റില് ഉള്പ്പെടുത്തേണ്ട ചില ഭക്ഷണങ്ങള് എന്തൊക്കെയാണെന്ന് നോക്കാം…
ഒന്ന്…
തൈര് ആണ് ആദ്യമായി ഈ പട്ടികയില് ഉള്പ്പെടുന്നത്. പോഷകങ്ങള് ധാരാളം അടങ്ങിയ തൈര് എല്ലുകളുടെയും പല്ലുകളുടെയും ആരോഗ്യത്തിന് നല്ലതാണ്. പ്രോട്ടീനിന്റെ ഏറ്റവും മികച്ച സ്രോതസ്സുകളിൽ ഒന്നാണ് യോഗർട്ട്. കുറഞ്ഞ കൊഴുപ്പുള്ള യോഗർട്ടിൽ ഉയർന്ന തോതിലുള്ള കാത്സ്യം അടങ്ങിയിരിക്കുന്നു. കൂടാതെ വിറ്റാമിനുകളായ ബി3, ബി6, ബി12 എന്നിവ ധാരാളം അടങ്ങിയതാണ് തൈര്. അതിനാല് ഇവ ഡയറ്റില് ഉള്പ്പെടുത്തുന്നത് പല്ലുകളുടെ ആരോഗ്യത്തിന് നല്ലതാണ്.
രണ്ട്…
പാലും പാലുത്പന്നങ്ങളും ആണ് രണ്ടാമതായി ഈ പട്ടികയില് ഉള്പ്പെടുന്നത്. പാല്, ചീസ്, എന്നിവയില് കാത്സ്യം, ഫോസ്ഫറസ് എന്നിവ അടങ്ങിയിട്ടുണ്ട്. ഇത് പല്ലിന്റെ ഇനാമലിനെ സംരക്ഷിക്കുകയും പല്ലിന്റെ ആരോഗ്യം നിലനിര്ത്തുകയും ചെയ്യും. പാല് ഉത്പന്നങ്ങളിലെ പോഷകങ്ങള്ക്ക് ബാക്ടീരിയ ഉത്പാദിപ്പിക്കുന്ന ചില ആസിഡുകളെ നിര്വീര്യമാക്കാന് കഴിയും. ഇതുവഴി ഇവയ്ക്ക് പല്ലുകളുടെ ആരോഗ്യത്തെ സംരക്ഷിക്കാന് കഴിയും.
മൂന്ന്…
ആപ്പിള് ആണ് മൂന്നാമതായി ഈ പട്ടികയില് ഉള്പ്പെടുന്നത്. പല്ലുകളില് ‘ക്യാവിറ്റി’ ഉണ്ടാകുന്നതു തടയാന് ആപ്പിള് സഹായിക്കും. ആപ്പിളില് ധാരാളമായി ഫൈബര് അടങ്ങിയിട്ടുണ്ട്. ഇത് മോണയുടെ ആരോഗ്യത്തിന് ഏറെ നല്ലതാണ്.
നാല്…
വിറ്റാമിന് സി ധാരാളം അടങ്ങിയ പഴങ്ങളും പച്ചക്കറികളും ദന്താരോഗ്യത്തിന് ഏറേ നല്ലതാണ്. അതിനാല് ഓറഞ്ച്, നാരങ്ങ, പൈനാപ്പിള്, തക്കാളി, വെള്ളരിക്ക തുടങ്ങിയവയൊക്കെ ഡയറ്റില് ഉള്പ്പെടുത്താം.
അഞ്ച്…
സ്ട്രോബെറി ആണ് അടുത്തതായി ഈ പട്ടികയില് ഉള്പ്പെടുന്നത്. വിറ്റാമിന് സി ധാരാളം അടങ്ങിയിരിക്കുന്ന സ്ട്രോബെറി ദന്താരോഗ്യത്തിന് നല്ലതാണ്.
ആറ്…
ഇലക്കറികളാണ് ആറാമതായി ഈ പട്ടികയില് ഉള്പ്പെടുന്നത്. ഇവയില് അടങ്ങിയിരിക്കുന്ന വിറ്റാമിന് എ, ‘ഫോളിക് ആസിഡ്’ എന്നിവ പല്ലിന്റെയും മോണയുടെയും ആരോഗ്യം മെച്ചപ്പെടുത്താന് സഹായിക്കും. അതിനാല് ചീര, ബ്രൊക്കോളി തുടങ്ങിയ ഇലക്കറികള് ഡയറ്റില് ഉള്പ്പെടുത്താം.
ഏഴ്…
വിറ്റാമിനുകള് ധാരാളം അടങ്ങിയ മധുര കിഴങ്ങും ദന്താരോഗ്യത്തിന് മികച്ചതാണ്. നാരുകള് ധാരാളം അടങ്ങിയ ഭക്ഷണങ്ങള് കഴിക്കുന്നതും പല്ലുകളുടെ ആരോഗ്യത്തിന് നല്ലതാണ്.
എട്ട്…
നട്സ് ആണ് അവസാനമായി ഈ പട്ടികയില് ഉള്പ്പെടുന്നത്. പോഷകങ്ങളും വിറ്റാമിനുകളും അടങ്ങിയ ഇവ കഴിക്കുന്നത് പല്ലുകളുടെ ആരോഗ്യത്തിന് ഏറെ നല്ലതാണ്. അതിനാല് ബദാം, വാള്നട്സ് തുടങ്ങിയവ ഡയറ്റില് ഉള്പ്പെടുത്താം.
ശ്രദ്ധിക്കുക: ആരോഗ്യ വിദഗ്ധന്റെയോ ന്യൂട്രീഷനിസ്റ്റിന്റെയോ ഉപദേശം തേടിയ ശേഷം മാത്രം ആഹാരക്രമത്തില് മാറ്റം വരുത്തുക.
