എറണാകുളം : സീറോ മലബാര് സഭയിലെ കുര്ബാന ഏകീകരണത്തില് അന്തിമ തീരുമാനം ഉടന് ഉണ്ടായേക്കും. ജനാഭിമുഖ കുര്ബാന അനുവദിക്കണമെന്നാവശ്യപ്പെട്ട് അങ്കമാലി അതിരൂപതയിലെ ഒരു വിഭാഗം വൈദികരുടെ നേതൃത്വത്തില് ഇന്ന് പ്രത്യേക ഉപവാസ സമരം നടത്തും. സമ്മര്ദ്ദത്തിന് വഴങ്ങി കുര്ബാന ഏകീകരണം അംഗീകരിക്കില്ലെന്ന നിലപാടിലാണ് പ്രതിഷേധം തുടരുന്ന വൈദികര്. ഒരു അതിരൂപതയ്ക്ക് മാത്രമായി പ്രത്യേക ഇളവ് നല്കാനാകില്ലെന്ന് നേരത്തെ സിനഡ് വിമതപക്ഷത്തെ അറിയിച്ചിരുന്നു. ഈ സാഹചര്യത്തില് പ്രതിഷേധം തുടരുന്ന വൈദികര് പുതിയ സമര പരിപാടികള് പ്രഖ്യാപിക്കും. അതേസമയം സീറോ മലബാര് സഭയിലെ കുര്ബാന ഏകീകരണം എറണാകുളം അങ്കമാലി അതിരൂപതയില് നടപ്പാക്കാത്തതില് മെത്രാപ്പൊലീത്തന് വികാരിമാര് ആന്റണി കരിയിലിന് വത്തിക്കാന് മുന്നറിയിപ്പ് നല്കിയിരുന്നു.
എറണാകുളം അങ്കമാലി അതിരൂപതയില് ഏകീകൃത കുര്ബാനയ്ക്ക് സമയപരിധിയില്ലാതെ ഇളവ് നല്കിയത് ചട്ടവിരുദ്ധമെന്ന് വ്യക്തമാക്കി വത്തിക്കാന് കത്തയച്ചു. സിനഡ് തീരുമാനങ്ങളുമായി ബന്ധപ്പെട്ട് പ്രശ്നങ്ങളുണ്ടെങ്കില് അതിന് സിനഡ് പരിഹാരം കണ്ടെത്തും. സമയപരിധിയില്ലാതെ ഇളവ് അനുവദിക്കാന് മെത്രാന് അധികാരമില്ല. ഇളവ് അധികാരത്തെക്കുറിച്ച് കഴിഞ്ഞ നവംബര് ഇരുപത്തിയാറിന് നല്കിയ കത്ത് തെറ്റായി വ്യാഖ്യാനിച്ചുവെന്നും വത്തിക്കാന്റെ കത്തില് പറയുന്നു.
