ഡല്‍ഹി: ഡല്‍ഹിയില്‍ വൈദ്യുതാഘാതമേറ്റ് യുവതിക്ക് ദാരുണാന്ത്യം. വെള്ളപ്പൊക്കമുള്ള റോഡിലൂടെ നടക്കാന്‍ ശ്രമിക്കുന്നതിനിടെ വൈദ്യുത തൂണില്‍ സ്പര്‍ശിച്ചതിനെ തുടര്‍ന്നാണ് യുവതിക്ക് വൈദ്യുതാഘാതമേറ്റത്. സാക്ഷി അഹൂജ എന്ന യുവതിയാണ് മരിച്ചത്. അഹൂജ ഞായറാഴ്ച പുലര്‍ച്ചെ 5.30 ന് സഹോദരിക്കും മൂന്ന് കുട്ടികള്‍ക്കുമൊപ്പം ഭോപ്പാലിലേക്കുള്ള ട്രെയിനില്‍ കയറാന്‍ ന്യൂഡല്‍ഹി റെയില്‍വേ സ്റ്റേഷനില്‍ എത്തിയാതായിരുന്നു.
എന്നാല്‍, സ്റ്റേഷനു പുറത്ത് വെള്ളക്കെട്ടുള്ള റോഡ് മുറിച്ചുകടക്കുമ്പോള്‍ താങ്ങിനായി വൈദ്യുതത്തൂണില്‍ പിടിച്ചതിനെ തുടര്‍ന്നാണ് വൈദ്യുതാഘാതമേറ്റത്. സംഭവം നടക്കുമ്പോള്‍ വൈദ്യുതത്തൂണില്‍ നിന്ന് ഏതാനും കമ്പികള്‍ പുറത്തേക്ക് തള്ളിനില്‍ക്കുകയായിരുന്നു. അതേസമയം, വൈദ്യുതാഘാതമേറ്റ യുവതിയെ സഹായിക്കാന്‍ സമീപത്തുള്ളവര്‍ ശ്രമിച്ചതായി ദൃക്സാക്ഷികള്‍ പറഞ്ഞു. തുടര്‍ന്ന് ഡല്‍ഹി പോലീസ് സ്ഥലത്തെത്തി യുവതിയെ ആശുപത്രിയിലെത്തിച്ചെങ്കിലും മരിച്ചതായി ഡോക്ടര്‍മാര്‍ സ്ഥിരീകരിച്ചു.
