ന്യൂഡൽഹി : ഇന്ത്യന്‍ യുവാക്കളെ ചൈനീസ് സൈന്യം തട്ടിക്കൊണ്ടു പോയ സംഭവത്തില്‍ കേന്ദ്രസര്‍ക്കാരിനെതിരെ രൂക്ഷ വിമര്‍ശനവുമായി രാഹുല്‍ ഗാന്ധി. പ്രധാനമന്ത്രിയുടെ മൗനമാണ് അദ്ദേഹത്തിന്റെ ഉത്തരം. മോദി മൗനം പാലിക്കുന്നത് അദ്ദേഹത്തിന് താല്‍പ്പര്യമില്ലാത്തത് കൊണ്ടാണെന്നും രാഹുല്‍ കുറ്റപ്പെടുത്തി. ”റിപ്പബ്ലിക് ദിനത്തിന് ദിവസങ്ങള്‍ക്ക് മുമ്പ് ഇന്ത്യയില്‍ നിന്ന് ഒരാളെ ചൈന തട്ടിക്കൊണ്ടുപോയി. ഞങ്ങള്‍ മിറാം തരൂണിന്റെ കുടുംബത്തോടൊപ്പമാണ്, പ്രതീക്ഷ കൈവിടില്ല.. വിട്ടുകൊടുക്കില്ല… പ്രധാനമന്ത്രിയുടെ മൗനമാണ് അദ്ദേഹത്തിന്റെ ഉത്തരം. അദ്ദേഹത്തിന് വിഷയത്തില്‍ താല്‍പ്പര്യമില്ല…’ – രാഹുല്‍ ട്വിറ്ററില്‍ കുറിച്ചു.
ചൈനയുടെ പീപ്പിള്‍സ് ലിബറേഷന്‍ ആര്‍മി (പിഎല്‍എ) ഇന്ത്യന്‍ യുവാക്കളെ തട്ടിക്കൊണ്ടുപോയെന്ന് ആരോപിക്കപ്പെടുന്ന സംഭവം ”നിര്‍ഭാഗ്യകരമെന്ന്” പാസിഘട്ട് വെസ്റ്റ് നിനോംഗ് എറിംഗ് കോണ്‍ഗ്രസ് എംഎല്‍എ വിശേഷിപ്പിച്ചു. അരുണാചല്‍ പ്രദേശിലെ സിഡോ ഏരിയ, അപ്പര്‍ സിയാങ് ജില്ല, ലുങ്താ ജോര്‍ ഏരിയയില്‍ നിന്ന് 17 വയസ്സുള്ള മിറാം തരോണിനെ ചൈനയുടെ PLA തട്ടിക്കൊണ്ടുപോയതായി എം.എല്‍.എ എഎന്‍ഐയോട് പറഞ്ഞു.
”ഇത് അരുണാചല്‍ പ്രദേശില്‍ ഉയര്‍ന്നുവന്ന ഗുരുതരമായ ഒരു പ്രശ്‌നമാണ്. അരുണാചല്‍ പ്രദേശിലെ സിഡോ ഏരിയ, അപ്പര്‍ സിയാങ് ജില്ല, ലുങ്താ ജോര്‍ ഏരിയയില്‍ നിന്ന് മിറാം തരോണിനെ ചൈനയുടെ PLA തട്ടിക്കൊണ്ടുപോയതായി ഞങ്ങള്‍ മനസ്സിലാക്കി. ചൈനക്കാര്‍ ഇന്ത്യന്‍ പ്രദേശത്തേക്ക് നുഴഞ്ഞുകയറുന്നത് ദൗര്‍ഭാഗ്യകരമാണ്” കോണ്‍ഗ്രസ് എംഎല്‍എ പറഞ്ഞു. ഇന്ത്യന്‍ ഭൂമിയിലേക്കുള്ള ചൈനയുടെ കടന്നുകയറ്റം പരിശോധിക്കണമെന്ന് അദ്ദേഹം കേന്ദ്ര സര്‍ക്കാരിനോട് ആവശ്യപ്പെട്ടു. ഇന്ത്യന്‍ പ്രദേശത്തിന് കീഴിലുള്ള ലുങ്താ ജോര്‍ എന്ന കാട്ടില്‍ നിന്ന് സിയുങ്ലയ്ക്ക് സമീപം വൈകുന്നേരം 6:30 ഓടെ ടാരോണിനെ തട്ടിക്കൊണ്ടുപോയതായി അദ്ദേഹത്തിന്റെ ട്വിറ്റര്‍ പോസ്റ്റ് പറയുന്നു.
