തിരുവനന്തപുരം: ലൈഫ് മിഷന് കേസില്നിന്ന് മുഖ്യമന്ത്രിയെ ഒഴിവാക്കിയത് ഒത്തുകളിയെന്ന് കെപിസിസി പ്രസിഡന്റ് കെ സുധാകരന്. തൃശൂര് വടക്കാഞ്ചേരി ലൈഫ് മിഷന് പദ്ധതിയുടെ കരാര് അട്ടിമറിച്ചത് മുഖ്യമന്ത്രിയുടെ സാന്നിധ്യത്തിലും അറിവോടെയുമാണെന്ന് ഇഡി ഹൈക്കോടതിയില് സമര്പ്പിച്ച കുറ്റപത്രത്തില് വ്യക്തമായി പരാമര്ശിക്കുന്നുണ്ട്. എന്നാല് മുഖ്യമന്ത്രിയെ കേസില് പ്രതി ചേര്ത്തിട്ടില്ല. ഇഡിയുടെ അതീവഗുരുതരമായ ഈ വീഴ്ചയ്ക്കെതിരേ വിചാരണവേളയില് കോണ്ഗ്രസ് കക്ഷിചേരുമെന്നും അദ്ദേഹം പറഞ്ഞു.
സംസ്ഥാന സര്ക്കാരിന്റെ ടെണ്ടര് നടപടികളിലൂടെ പോയാല് പദ്ധതി തുകയില്നിന്ന് കൈക്കൂലി തുക മാറ്റാന് ബുദ്ധിമുട്ടാകും എന്നു മുഖ്യമന്ത്രി പറഞ്ഞതിനെ തുടര്ന്നാണിതെന്ന് കുറ്റപത്രത്തിലുണ്ട്. ഇതാണ് ലൈഫ് മിഷന് ഇടപാടിലെ നിര്ണായക സംഭവം. മുഖ്യമന്ത്രിയുടെ നേരിട്ടുള്ള ഇടപെടലുകള് കുറ്റപത്രത്തില് അക്കമിട്ട് നിരത്തിയിട്ടുണ്ട്. എന്നാല് ഈ കേസില് മുഖ്യമന്ത്രിയുടെ പ്രിന്സിപ്പല് സെക്രട്ടറി എം ശിവശങ്കര് ജയിലില് കഴിയുമ്പോള് ഇഡി മുഖ്യമന്ത്രിയെ ചോദ്യം ചെയ്തതു പോലുമില്ല. 11 പ്രതികളുള്ള കേസില് മുഖ്യമന്ത്രി ഒന്നാം പ്രതിയായി വരേണ്ട കേസാണിത്. ബിജെപിയുമായി മറ്റൊരു ഒത്തുകളി നടത്തിയാണ് മുഖ്യമന്ത്രിയെ കേസില്നിന്ന് ഒഴിവാക്കിയതെന്നും അദ്ദേഹം ആരോപിച്ചു.
