കേരള നിയമസഭയിലെ കയ്യാങ്കളി കേസിൽ തുടരന്വേഷണം ആവശ്യപ്പെട്ട് പൊലീസ് കോടതിയിൽ. കേസിൽ ഏറെ കാര്യങ്ങൾ അന്വേഷിക്കാനുണ്ടെന്നാണ് പറയുന്നത്. ക്രൈം ബ്രാഞ്ച് ഡി.വൈ.എസ്.പി സജീവ് തിരുവനന്തപുരം സി.ജെ.എം കോടതിയിലാണ് ഹരജി നൽകിയത്. കേസിൽ വിചാരണ തുടങ്ങാനിരിക്കെയാണ് പൊലീസ് നീക്കം. ഇടതുമുന്നണിയുടെ പ്രമുഖ നേതാക്കൾ പ്രതികളായ കേസിൽ വിചാരണ വൈകിപ്പിക്കാനുള്ള പൊലീസിന്റെ നീക്കമാണിതെന്ന വിമർശനം ശക്തമാണ്. പൊലീസ് നീക്കം അസാധാരണ നടപടിയാണെന്ന് വിലയിരുത്തുന്നവരും ഏറെയാണ്.
സി.പി.ഐ നേതാവും മുൻ എം.എൽ.എയുമായിരുന്ന ബിജിമോൾ ഉൾപ്പടെയുള്ളവർ തുടരന്വേഷണം ആവശ്യപ്പെട്ട് കോടതിയെ സമീപിച്ചിരുന്നു. പ്രോസിക്യൂഷൻ ഇത് എതിർക്കുകയായിരുന്നു. എന്നാൽ, ഇപ്പോൾ പൊലീസ് സംഘം തന്നെ കേസിൽ പ്രതികളായ നിലവിലെ മന്ത്രിമാർക്ക് അനുകൂലമായ രീതിയിൽ അന്വേഷണം നീട്ടിക്കൊണ്ടുപോകാനുള്ള നീക്കങ്ങൾ ആരംഭിച്ചിരിക്കുന്നത് രാഷ്ട്രീയ സമ്മർദ്ധത്തിെൻറ ഭാഗമായാണെന്നാണ് പറയുന്നത്.
2015 മാർച്ച് 13ന് ബാർ കോഴ വിവാദം കത്തിനിൽക്കെ ധനമന്ത്രി കെ.എം. മാണിയുടെ ബജറ്റ് അവതരണം തടസപ്പെടുത്താനാണ് നിയസമഭയിൽ അന്ന് പ്രതിപക്ഷത്തെ ഇടതു എം.എൽ.എമാർ പ്രതിഷേധം കാഴ്ചവെച്ചത്. പ്രതിപക്ഷം സ്പീക്കറുടെ കസേരടയടക്കം മറിച്ചിട്ടു. മന്ത്രി ശിവൻകുട്ടിക്ക് പുറമെ ഇ.പി. ജയരാജൻ, കെ.ടി. ജലീൽ, കെ. അജിത്ത് എന്നിവരടക്കമുള്ള എം.എൽ.എമാർക്കെതിരെ പൊതുമുതൽ നശിപ്പിച്ചതടക്കമുള്ള വകുപ്പുകൾ ചേർത്താണ് കൻറോൺമെൻറ് പൊലീസ് കേസെടുത്തത്.
