തിരുവനന്തപുരം > സംസ്ഥാനത്ത് മഴ ശക്തമായ സാഹചര്യത്തിൽ റോഡുകളിൽ ശ്രദ്ധിക്കേണ്ട കാര്യങ്ങളെക്കുറിച്ച് മുന്നറിയിപ്പുമായി കേരള പൊലീസ്. നിരത്തുകളിൽ വാഹനങ്ങൾ തെന്നി നീങ്ങി അപകടം ഉണ്ടാവാനുള്ള സാധ്യത ഏറെയാണ്. ഇരുചക്ര വാഹനം മുതൽ വലിയ വാഹനങ്ങൾ വരെ ഇത്തരത്തിൽ നനഞ്ഞ റോഡുകളിൽ ബ്രേക്കിടുമ്പോൾ തെന്നാനും അപകടം സംഭവിക്കാനും ഇടയുണ്ട്.
അത്തരം സംഭവങ്ങൾ ഉണ്ടാകുവാനുള്ള സാഹചര്യങ്ങൾ കണക്കിലെടുത്ത് പൊതുജനങ്ങൾക്ക് നിർദേശങ്ങൾ പങ്കുവെച്ചിരിക്കുകയാണ് കേരള പൊലീസ്. മ‍ഴയത്ത് അമിത വേഗത്തിൽ വന്ന കാർ മതിലിൽ ഇടിക്കുന്നതും ഒപ്പം മറ്റു കാറുകളും അപകടത്തിൽ പെടുന്നതുമായ വീഡിയോ പങ്കു വെച്ചുകൊണ്ടാണ് പൊലീസിന്റെ മുന്നറിയിപ്പ്. മുന്നിൽ പോയ വാഹനം ബ്രേക്കിട്ടപ്പോൾ പുറകെ വന്ന വാഹനങ്ങൾ വരിയായി ഇടിക്കുന്നതുമായ ദൃശ്യങ്ങളും വീഡിയോയിലുണ്ട്.
വാഹനങ്ങൾ തെന്നി നീങ്ങാൻ സാധ്യതയേറെയാണെന്നും അതിനാൽ വേഗത കുറയ്ക്കണമെന്നും പൊലീസ് പറഞ്ഞു. സഡൻ ബ്രേക്ക് ഒഴിവാക്കുക, സുരക്ഷിത അകലം പാലിക്കുക, ടയറുകളുടെയും ബ്രേക്കിന്റെയും പ്രവർത്തനക്ഷമത ഉറപ്പാക്കുക എന്നീ നിർദേശങ്ങളുമുണ്ട്.
