തിരുവനന്തപുരം∙ കരാറുകാരനിൽ നിന്നു 30,000 രൂപ കൈക്കൂലി വാങ്ങുന്നതിനിടെ കെഎസ്ആർടിസി ഡപ്യൂട്ടി ജനറൽ മാനേജരെ വിജിലൻസ് പിടികൂടി. കെഎസ്ആർടിസി ആസ്ഥാനമായ ട്രാൻസ്പോർട്ട് ഭവനിലെ ഉദയകുമാറാണ് പിടിയിലായത്. പരസ്യം പതിക്കുന്ന കരാറെടുത്ത കരാറുകാരനിൽ നിന്നു സ്വകാര്യ ക്ലബ്ബിൽ വച്ച് കൈക്കൂലി വാങ്ങുന്നതിനിടെ വിജിലൻസ് സംഘം അറസ്റ്റ് ചെയ്യുകയായിരുന്നു. ബസിൽ പരസ്യം പതിക്കുന്നതിന് കരാറെടുത്ത പരാതിക്കാരന് ആറര ലക്ഷം രൂപയുടെ ബില്ല് കഴിഞ്ഞയാഴ്ച മാറി നൽകിയിരുന്നു, ഈ ബിൽ മാറി നൽകുന്നതിന് ഉദയകുമാർ ഒരു ലക്ഷം രൂപ കൈക്കൂലിയായി ആവശ്യപ്പെട്ടു. ഇതിൽ 40,000 രൂപ ബുധനാഴ്ചയും 30,000 രൂപ ഇന്നലെയും നൽകി. ബാക്കി തുക നൽകിയില്ലെങ്കിൽ ഇനി മാറാനുള്ള പന്ത്രണ്ട് ലക്ഷം രൂപയുടെ ബില്ല് മാറി നൽകില്ലെന്ന് പറഞ്ഞ് ഭീഷണിപ്പെടുത്തി. കരാറുകാരൻ വിവരം അറിയിച്ചതിനെ തുടർന്ന് ഇന്നലെ രാത്രി 7ന് വിജിലൻസ് സംഘം കെണി ഒരുക്കി പിടികൂടുകയായിരുന്നു. പ്രതിയെ തിരുവനന്തപുരം വിജിലൻസ് കോടതിയിൽ ഇന്ന് ഹാജരാക്കും.
