കൊടിയത്തൂർ : വിരണ്ടോടിയ പോത്ത് നാട്ടുകാരെ മണിക്കൂറുകളോളം ഭീതിയിലാഴ്ത്തി. ഒരാളെ കുത്തിപ്പരിക്കേൽപ്പിക്കുകയും ഒട്ടേറെ വാഹനങ്ങൾ ആക്രമിക്കുകയും ചെയ്തു. കൊടിയത്തൂർ പഞ്ചായത്തിലെ ഗോതമ്പ്റോഡിൽ അറവിനായി കൊണ്ടുവന്ന പോത്താണ് വിരണ്ടോടി ഭീതിവിതച്ചത്. ഇസ്മായിൽ എന്ന ആളുടേതാണ് പോത്ത്. വെള്ളിയാഴ്ച പുലർച്ചെ അഞ്ചുമണിയോടെ പലയിടങ്ങളിലായി വിരണ്ടോടിയ പോത്തിനെ ഉച്ചയ്ക്ക് 12 മണിയോടെയാണ് എടവണ്ണ കൊയിലാണ്ടി സംസ്ഥാനപാതയിൽ ഗോതമ്പ്റോഡ് അങ്ങാടിയിൽവെച്ച് നാട്ടുകാരും മുക്കം അഗ്നിരക്ഷാസേനയും ചേർന്ന് സാഹസികമായി പിടികൂടിയത്. പിടികൂടാൻ ശ്രമിക്കുന്നതിനിടെയും ആളുകൾക്ക് ചെറിയതോതിലുള്ള പരിക്കുകൾ പറ്റി. മുക്കം അഗ്നിരക്ഷാനിലയം ഓഫീസർ ഷംസുദ്ദീൻ, ഗ്രേഡ് സ്റ്റേഷൻ ഓഫീസർ പയസ് അഗസ്റ്റിൻ, ഫയർ ഓഫീസർമാരായ ജലീൽ, ഷൈബിൻ, ജയേഷ്, ജിതിൻരാജ് തുടങ്ങിയവർ നേതൃത്വം നൽകി.
