വൈറ്റമിന്‍ സി, ആന്‍റി ഓക്സിഡന്‍റുകള്‍ എന്നിങ്ങനെ ശരീരത്തിന് ആവശ്യമായ പലവിധ പോഷണങ്ങള്‍ അടങ്ങിയ ഒന്നാണ് നാരങ്ങ. ഇതുകൊണ്ടുതന്നെ നാരങ്ങ കഴിച്ചു കൊണ്ട് ദിവസം ആരംഭിച്ചാല്‍ പല തരത്തിലുള്ള ആരോഗ്യ ഗുണങ്ങള്‍ ഉണ്ടാകാം. രാവിലെ വെറും വയറ്റില്‍ ചെറു ചൂടുവെള്ളത്തില്‍ നാരങ്ങ പിഴിഞ്ഞ് കുടിച്ചാല്‍ ഇനി പറയുന്ന പ്രയോജനങ്ങള്‍ ശരീരത്തിന് ലഭിക്കും.
1. വിഷാംശം കുറയ്ക്കും
നാരങ്ങയില്‍ അടങ്ങിയിട്ടുള്ള ഫ്ളാവനോയ്ഡുകള്‍ എന്ന പദാര്‍ഥത്തിന് ആന്‍റി ഓക്സിഡന്‍റ്, ആന്‍റി ഇന്‍ഫ്ളമേറ്ററി ഗുണങ്ങളുണ്ട്. ഇത് ശരീരത്തില്‍ രൂപപ്പെടുന്ന രോഗ കാരണങ്ങളായേക്കാവുന്ന ഫ്രീ റാഡിക്കലുകളെ ഇല്ലായ്മ ചെയ്യാന്‍ സഹായിക്കും. ശരീരത്തിലെ വിഷാംശം കുറയ്ക്കാനും ഇതിലൂടെ സാധിക്കും.
2. ദഹനത്തിനു നല്ലത്
രാവിലെ നാരങ്ങ വെള്ളം കുടിക്കുന്നത് ദഹനരസങ്ങളുടെ ഉൽപാദനത്തെ ഉത്തേജിപ്പിക്കും. ഇത് ദഹനത്തിന് സഹായകമാണ്.
3. പ്രതിരോധശേഷി വര്‍ധിപ്പിക്കും
നാരങ്ങയില്‍ അടങ്ങിയിട്ടുള്ള വൈറ്റമിന്‍ സി ഹാനികരങ്ങളായ ഫ്രീ റാഡിക്കലുകളില്‍ നിന്ന് ശരീരത്തെ സംരക്ഷിക്കും. ഹോര്‍മോണുകളുടെ ഉൽപാദനത്തെ ഉത്തേജിപ്പിക്കാനും അയണിന്‍റെ ആഗീരണം മെച്ചപ്പെടുത്താനും വൈറ്റമിന്‍ സി സഹായിക്കും. പ്രതിരോധസംവിധാനത്തെ ശക്തിപ്പെടുത്തി രോഗങ്ങളില്ലാത്ത അവസ്ഥയും ഇത് സംജാതമാക്കും.
4. ജലാംശം നിലനിര്‍ത്തും
ശരീരത്തിന്‍റെ ജലാംശം മെച്ചപ്പെടുത്തി കൊണ്ട് ഒരു ദിവസം ആരംഭിക്കാന്‍ നാരങ്ങ വെള്ളം ഉത്തമമാണ്. ശരീരത്തിലെ ജലാംശം നിലനിര്‍ത്തേണ്ടത് ആകമാന ആരോഗ്യത്തിനും ക്ഷേമത്തിനും അത്യാവശ്യമാണ്.
5. ഭാരം കുറയ്ക്കാം
നാരങ്ങയില്‍ അടങ്ങിയിരിക്കുന്ന പെക്ടിന്‍ ഫൈബര്‍ വിശപ്പിനെ അടക്കാനും ഭാരം കുറയ്ക്കാനും സഹായകമാണ്. ചയാപചയം മെച്ചപ്പെടുത്താനും നാരങ്ങ നല്ലതാണ്.
6. വൃക്കയുടെ ആരോഗ്യം മെച്ചപ്പെടുത്തും
വൃക്കയിലെ കല്ലുകളെ ലഘൂകരിക്കാന്‍ നാരങ്ങ വെള്ളം സഹായിക്കുമെന്ന് ചില പഠനങ്ങള്‍ ചൂണ്ടിക്കാണിക്കുന്നു. വൃക്കകളില്‍ ധാതുക്കള്‍ അടിഞ്ഞാണ് കല്ലുകള്‍ രൂപപ്പെടുന്നത്. ഈ പ്രക്രിയയെ നാരങ്ങയിലെ സിട്രേറ്റ് പ്രതിരോധിക്കുന്നു.
7. പിഎച്ച് തോത് മെച്ചപ്പെടുത്തും
നാരങ്ങ അസിഡിക് വസ്തു ആണെങ്കിലും ശരീരത്തിന്‍റെ പിഎച്ച് സന്തുലനത്തെ മെച്ചപ്പെടുത്താന്‍ നാരങ്ങ വെള്ളം സഹായിക്കും.
8. വായ്നാറ്റം അകറ്റും
ആന്‍റി ബാക്ടീരിയല്‍ ശേഷിയുള്ള നാരങ്ങ വെള്ളം രാവിലെ കുടിക്കുന്നത് വായിലെ അണുക്കളെ നശിപ്പിക്കാനും വായ്നാറ്റം അകറ്റാനും സഹായിക്കും.
9. ഹൃദ്രോഗത്തിന് നല്ലത്
നാരങ്ങയുടെ ആന്‍റി ഓക്സിഡന്‍റ് ഗുണങ്ങള്‍ ഹൃദ്രോഗത്തെയും ചെറുക്കാന്‍ നല്ലതാണ്. ഫ്രീ റാഡിക്കലുകള്‍ ഉണ്ടാകുന്നതിനെ തടയുന്ന നാരങ്ങ ഹൃദയത്തെയും ഇത് വഴി കാക്കുന്നു.
10. ഇലക്ട്രോലൈറ്റുകളുടെ സ്രോതസ്സ്
പൊട്ടാസ്യം, കാല്‍സ്യം, മഗ്നീഷ്യം തുടങ്ങിയ ഇലക്ട്രോലൈറ്റുകള്‍ ശരീരത്തിന് നല്‍കാനും നാരങ്ങ വെള്ളത്തിന് സാധിക്കും. ഇത് പേശികളുടെയും ഹൃദയത്തിന്‍റെയും പ്രവര്‍ത്തനത്തെ മെച്ചപ്പെടുത്തും.
