തൃക്കരിപ്പൂർ : തൃക്കരിപ്പൂർ മുച്ചിലോട്ടിന് സമീപത്തെ എൻ.സുനിൽകുമാറിനെ മുച്ചിലോട്ട് കുളത്തിൽ മരിച്ചനിലയിൽ കണ്ടെത്തിയ സംഭവത്തിൽ രണ്ടുപേരെ ചന്തേര പോലീസ് അറസ്റ്റ് ചെയ്തു. സംഭവ ദിവസം രാത്രി സുനിൽകുമാറിനൊപ്പമുണ്ടായിരുന്ന കെ.അനുപ് (35), പി.ദീപക് (37) എന്നിവരാണ് അറസ്റ്റിലായത്. ഈ മാസം എട്ടിന് രാവിലെയാണ് മൃതദേഹം കുളത്തിൽ കണ്ടെത്തിയത്.
മരണത്തിൽ സംശയം പ്രകടിപ്പിച്ച് ഭാര്യ ഷിനി ജില്ലാ പോലീസ് സൂപ്രണ്ടിനുനൽകിയ പരാതിയിലാണ് അറസ്റ്റ്. ആദ്യം ചന്തേര പോലീസിൽ പരാതി നൽകിയെങ്കിലും പോലീസിന്റെ ഭാഗത്തുനിന്ന് അന്വേഷണം കാര്യമായി നടന്നിരുന്നില്ല. സുനിൽകുമാറിന്റെ കൂടെയുണ്ടായിരുന്നവരെ സ്റ്റേഷനിൽ വരുത്തി ചോദ്യംചെയ്തശേഷം വിട്ടയച്ചിരുന്നു. തുടർന്ന് ഷിനി നേരിട്ട് ജില്ലാ പോലീസ് സൂപ്രണ്ടിനുമുന്നിൽ പരാതിപ്പെടുകയും മുഖ്യമന്ത്രി, എം.രാജഗോപാലൻ എം.എൽ.എ., യുവജന കമ്മിഷൻ എന്നിവർക്ക് പരാതി നൽകുകയും ചെയ്തു.
തുടർന്നാണ് പോലീസ് അന്വേഷണം ഊർജിതമാക്കുകയും 304 വകുപ്പ് പ്രകാരം ഇവർക്കെതിരേ കേസെടുത്ത് അറസ്റ്റ് രേഖപ്പെടുത്തുകയും ചെയ്തത്. ശനിയാഴ്ച ഇരുവരെയും കോടതിയിൽ ഹാജരാക്കി. സംഭവം നടന്ന ഏഴിന് രാത്രി കുളത്തിന് സമീപം സുനിൽകുമാറിനൊപ്പം അറസ്റ്റ് ചെയ്തവരും ഉണ്ടായിരുന്നു. പരിസരത്തെ സി.സി.ടി.വി.യിൽ ഇവരുടെ ദൃശ്യങ്ങൾ പതിഞ്ഞിരുന്നു. രാത്രി പതിനൊന്നരമണിയായിട്ടും സുനിൽകുമാർ വീട്ടിലെത്താത്തതിനാൽ ഭാര്യ ഷിനി സുനിൽകുമാറിനെ ഫോണിൽ വിളിച്ചിരുന്നു. പിന്നീട് ഫോൺ വിളിച്ചപ്പോൾ ഫോണെടുത്തില്ല.
