തിരുവനന്തപുരം: സൗദി അറേബ്യയില് പള്ളിക്ക് പുറത്ത് ബാങ്ക് വിളി കേട്ടില്ല എന്ന പരാമര്ശത്തില് വിശദീകരണവുമായി മന്ത്രി സജി ചെറിയാന്. തനിക്ക് ലഭിച്ച തെറ്റായ വിവരത്തിന്റെ അടിസ്ഥാനത്തിലായിരുന്നു അത്തരം ഒരു പ്രതികരണം നടത്തിയത്. കഴിഞ്ഞ ദിവസം താന് നടത്തിയ പ്രസംഗത്തിലെ ചില ഭാഗങ്ങള് തന്റെ ഉദ്ദേശശുദ്ധിയെ മനസിലാക്കാതെ ചിലര് പ്രചരിപ്പിക്കുകയാണെന്ന് ചൂണ്ടിക്കാട്ടിയാണ് മന്ത്രിയുടെ പ്രതികരണം. ഫേസ്ബുക്ക് പോസ്റ്റിലായിരുന്നു മന്ത്രി സാഹചര്യം വിശദീകരിച്ചത്.
സൗദി അറേബ്യയില് സന്ദര്ശനം നടത്തിയ അവസരത്തില് മതാനുഷ്ഠാനങ്ങള്, പ്രഭാഷണങ്ങള് എന്നിവ നടത്തുന്നത് സംബന്ധിച്ചും അവിടെ പാലിക്കുന്ന മിതത്വത്തെ സംബന്ധിച്ചും മറ്റ് മതസ്ഥരോടും അന്യനാട്ടുകാരോടും അവര് കാണിക്കുന്ന സ്നേഹവും ബഹുമാനത്തെപ്പറ്റിയും സഹയാത്രികന് പറഞ്ഞതാണ് പ്രസംഗത്തില് പറഞ്ഞത്. ബാങ്ക് വിളി കേട്ടില്ല എന്ന എന്റെ പരാമര്ശം ലഭിച്ച തെറ്റായ വിവരത്തില് നിന്നും സംഭവിച്ചതാണ്. ഇക്കാര്യം മനസിലാക്കി തെറ്റിദ്ധാരണ മാറ്റണമെന്ന് അഭ്യര്ത്ഥിക്കുകയാണ് എന്നും മന്ത്രി ഫേസ് ബുക്ക് പോസ്റ്റില് പറയുന്നു. മത സൗഹാര്ദത്തിന്റെ മികച്ച മാതൃക സൗദിയില് കണ്ടതെന്നും അദ്ദേഹം ചൂണ്ടിക്കാട്ടുന്നു.
