ദില്ലി: ലക്ഷദ്വീപില് മദ്യം ലഭ്യമാക്കാനുള്ള ലക്ഷദ്വീപ് എക്സൈസ് റഗുലേഷന് കരടുബില്ലില് അഭിപ്രായം തേടി സര്ക്കാര്. അഡീഷണല് ജില്ലാ കളക്ടര് ഡോ ആര് ഗിരിശങ്കറാണ് ഇതു സംബന്ധിച്ച ഉത്തരവിറക്കിയത്. മുപ്പത് ദിവസത്തിനുള്ളില് അഭിപ്രായം അറിയിക്കണമെന്നാണ് ഉത്തരവില് പറയുന്നത്. മദ്യനിര്മാണം, സംഭരണം, വില്പന തുടങ്ങിയവയ്ക്ക് ലൈസന്സ് നല്കല്, എക്സൈസ് കമ്മീഷണറെ നിയമിക്കല്, വ്യാജമദ്യവില്പനയ്ക്കുള്ള ശിക്ഷ, നികുതിഘടന എന്നിവ അടങ്ങുന്ന വിശദമായ ചട്ടങ്ങളാണ് കരടുബില്ലിലുള്ളത്. ബില്ല് നിലവില് വന്നാല് 1979-ലെ ലക്ഷദ്വീപ് മദ്യനിരോധന നിയമം ഇല്ലാതെയാകും. നിലവില് ലക്ഷദ്വീപില് മദ്യത്തിന് നിരോധനമുണ്ട്. എന്നാല് ടൂറിസ്റ്റ് കേന്ദ്രമായ ബങ്കാരം ദ്വീപില് ടൂറിസ്റ്റുകള്ക്കുമാത്രമായി നിയന്ത്രണത്തോടെ മദ്യം നല്കുന്നുണ്ട് . കവരത്തി, മിനിക്കോയ്, കടമം റിസോര്ട്ടുകളിലേക്കുകൂടി ഇത് വ്യാപിപ്പിക്കാന് 2021-ല് ശ്രമിച്ചെങ്കിലും പ്രതിഷേധം കാരണം നടന്നില്ല.
