ദില്ലി: സൂപ്പര്‍ഫാസ്റ്റ് എക്സ്പ്രസ് ട്രെയിനിലെ രണ്ട് എസി കോച്ചുകളില്‍ വൈദ്യുതി തടസ്സപ്പെട്ടതിനെ തുടര്‍ന്ന് കുപിതരായ യാത്രക്കാര്‍ ടിക്കറ്റ് എക്‌സാമിനറെയും സഹായിയെയും ട്രെയിനിലെ ശുചിമുറിയില്‍ പൂട്ടിയിട്ടു. ടിടിഇ ഹരീഷ് ചന്ദ്ര യാദവിനെയും മറ്റൊരു ജീവനക്കാരനെയുമാണ് പൂട്ടിയിട്ടത്. ദില്ലി ആനന്ദ് വിഹാര്‍ ടെര്‍മിനലില്‍ നിന്ന് ഉത്തര്‍പ്രദേശിലെ ഗാസിപൂരിലേക്ക് പോകുകയായിരുന്ന സുഹൈല്‍ദേവ് സൂപ്പര്‍ഫാസ്റ്റ് എക്സ്പ്രസ് ട്രെയിനിലാണ് വെള്ളിയാഴ്ച സംഭവം നടന്നത്. വാര്‍ത്താ ഏജന്‍സിയ പിടിഐയാണ് സംഭവം റിപ്പോര്‍ട്ട് ചെയ്തത്.
ആനന്ദ് വിഹാര്‍ ടെര്‍മിനലില്‍ നിന്ന് പുറപ്പെട്ടതിന് പിന്നാലെ ട്രെയിനിലെ ബി 1, ബി 2 കോച്ചുകളിലെ ലൈറ്റ് ഓഫ് ആകുകയും വൈദ്യുതി തകരാര്‍ മൂലം എസികള്‍ പ്രവര്‍ത്തന രഹിതമാകുകയും ചെയ്തു. ടിടിഇയെ സംഭവം അറിയിച്ചെങ്കിലും ഏറെ നേരം കഴിഞ്ഞ് പ്രശ്‌നത്തിന് പരിഹാരമില്ലാതായതോടെയാണ് ടിടിഇയെ പിടികൂടി ശുചിമുറിയില്‍ പൂട്ടിയിട്ടത്. രണ്ട് കോച്ചുകളിലെ എസി തകരാറിനെക്കുറിച്ച് മുന്നറിയിപ്പ് നല്‍കിയിട്ടും അലിഗഡ് ജംഗ്ഷനില്‍ ട്രെയിന്‍ നിര്‍ത്താത്തതിനാലാണ് യാത്രക്കാര്‍ ക്ഷുഭിതരായത്. തുടര്‍ന്ന് റെയില്‍വേ പൊലീസും ഉദ്യോഗസ്ഥരും ചേര്‍ന്ന് പ്രശ്നം ഉടന്‍ പരിഹരിക്കുമെന്ന് യാത്രക്കാര്‍ക്ക് ഉറപ്പ് നല്‍കിയതോടെ ടിടിഇയെ മോചിപ്പിച്ചു. പിന്നീട് പുലര്‍ച്ചെ ഒന്നോടെ തുണ്ട്ല സ്റ്റേഷനില്‍ ട്രെയിന്‍ രണ്ട് മണിക്കൂറിലേറെ നിര്‍ത്തിവെച്ച് പരിശോധിക്കുകയും എന്‍ജിനീയര്‍മാരുടെ സംഘം തകരാര്‍ പരിഹരിക്കുകയും യാത്ര തുടരുകയും ചെയ്തു.
